3-yanvar kuni Urganch va Nukus aeroportlarida ko‘rish imkoniyati yomonligi sababli samolyotlar uchish va qo‘nishni amalga oshira olmadi. Bu haqda Uzbekistan Airports matbuot xizmati xabar berdi.
Urganch aeroportidagi kuchli tuman tufayli — ko‘rish masofasi 200 metr atrofida — “Aeroflot” aviakompaniyasining Moskvadan parvoz qilayotgan AFL1976 reysi soat 03:25 da “Sheremetevo” aerportidan uchib keta olmagan.
Yana ikki reysda ham xuddi shunday holat kuzatilgan: S7 Airlines aviakompaniyasining Samara—Urganch yo‘nalishi bo‘yicha soat 04:35 da uchishi kerak bo‘lgan SBI6481 reysi hamda “Ural” aviakompaniyasining Sankt-Peterburgdan soat 03:30 da uchishi kerak bo‘lgan SVR2473 reysi.
Ayni vaqtda samolyotlar Urganchdagi ob-havo sharoitlari yaxshilangunga qadar jo‘natuvchi-aeroportlarda qolmoqda.
Kuchli tuman — ko‘rish masofasi 200 metr — shuningdek, Nukus aeroporti faoliyatini cheklab qo‘ygan. Uzbekistan Airways’ning ikki reysi Toshkentga parvozini kutmoqda. Bundan tashqari, soat 11:30 da Nukus—Aqtau yo‘nalishi bo‘yicha uchishi kutilayotgan reys ham kechiktirilishi mumkin.
Uzbekistan Airways matbuot xizmatining ma’lum qilishicha, Nukus va Urganch aeroportlarida meteorologik sharoit tobora yomonlashib borayotgani munosabati bilan avval rejalashtirilgan HY-051/052, 053/054, 011/012 reyslari vaziyat o‘zgarmaguniga qadar qoldirilgan. Uchish vaqti taxminan soat 16:00 ga rejalashtirilmoqda.
Eslatib o‘tamiz, 24-dekabr kuni Toshkentdan uchadigan samolyot tuman tufayli Andijonga qo‘na olmagan, 29-dekabr kuni esa Namangan va Andijon aeroportlarida ko‘rish imkoniyati yomonligi sababli samolyotlar uchish va qo‘nishni amalga oshira olmagandi.
Izoh (0)