Samarqand maydoni yaqin atrofdagi beshta tuman hududlarining bir qismi qo‘shilishi hisobiga amaldagi 12,4 ming gektardan 30,5 ming gektarga kengayadi. Bu haqda Prezident Shavkat Mirziyoyev Samarqand viloyatiga tashrifi doirasida ma’lum qildi, deb xabar bermoqda “Gazeta.uz”.

Samarqand viloyati hokimi Erkinjon Turdimov 2021-yil 15-aprelda Samarqand shahrini kengaytirish loyihasini ko‘rsatmoqda.

Foto: “O‘zbekiston 24”

Davlat rahbarining so‘zlariga ko‘ra, shaharga Samarqand, Pastdarg‘om, Toyloq va Oqdaryo tumanlari hisobiga 18 gektar maydonni qo‘shish rejalashtirilmoqda. Bu Samarqandni millionli shaharga aylantirish imkonini beradi.

Samarqandning kengaytirilgandan so‘ng qanday o‘zgarishi.

Foto: “O‘zbekiston 24”

Bundan tashqari, sayyohlar va aholiga qulay bo‘lishi uchun avtomobillar harakatlanishini cheklash rejalashtirilgan Samarqand viloyatining ma’muriy markazi Gulobod bo‘ladi. “Bu yerda sayyohlar uchun barcha sharoitlar bo‘ladi. Bu yerda avtomobillar harakatlanishi taqiqlanadi… Gulobodda yangi markaz quramiz”, — degan Prezident.

Shavkat Mirziyoyev kelajak haqida o‘ylash kerakligini, shunday o‘zgarishlar qilinmasa, “Samarqandga kirib bo‘lmay qolishi”ni ta’kidlagan.

Prezident bosh vazir birinchi o‘rinbosari Ochilboy Ramatov, Samarqand viloyati hokimi Erkinjon Turdimov va qurilish vaziri Botir Zokirovga yil oxiriga qadar shaharning kengayishini hisobga olib, Samarqandning bosh rejasini ishlab chiqishni topshirdi.

Buning uchun Turkiyadan loyiha instituti ham jalb qilinadi.

Boshqaruv tizimini yaxshilash maqsadida, shaharda bosqichma-bosqich beshta tuman — So‘g‘diyona, Siyob, Bog‘ishamol, Maroqand va Qorasuv (hokim taqdimotida Yangikent ko‘rsatilgan) tashkil etiladi. Prezident hozircha 2-3 ta tumanni tashkil etish rejalashtirilganini qo‘shimcha qilgan.

Aprel oyining boshlarida Samarqand viloyati hokimi Erkinjon Turdimov Samarqand shahri kengaytirilishini ma’lum qila turib, million aholisi bor shahar “o‘z statusi borligini”, bu boshqa narsalar qatori uning investitsiyaviy jozibadorligini oshirishga yordam berishini aytgandi.