Самарқанд ва Наманган шаҳарларини истиқболда «миллионлик шаҳарлар»га айлантириш бўйича чоралар кўрилади. Бу ҳақда 2022—2026 йилларга мўлжалланган тараққиёт стратегиясини 2022 йилда амалга ошириш бўйича «Йўл харитаси» лойиҳасида кўзда тутилган.
Хусусан, 2022 йилнинг мартида Самарқанд ва Наманган шаҳарларини «миллионлик шаҳарлар»га айлантириш бўйича республика ишчи гуруҳлари ташкил этилади. Июнь ойида Самарқанд ва Наманган шаҳарларининг чегараларини ўзгартириш масаласи халқ депутатлари маҳаллий кенгашларида кўриб чиқилади. Август ойида Самарқанд ва Наманган шаҳарлари чегараларини ўзгартириш бўйича Олий Мажлис Сенати ва Қонунчилик палатаси қарорлари ишлаб чиқилади.
Бундан ташқари, 2022 йилнинг мартида Қашқадарё вилоятининг урбанизация даражасини 50 фоизга етказиш режалаштирилган. Шу мақсадда Қашқадарё вилоятида урбанизация даражасини янада яхшилаш бўйича чора-тадбирлар ишлаб чиқилади.
Бунда:
- 12 та шаҳар, 117 та шаҳарча ва 1041 та қишлоқ аҳоли пунктлари инвентаризациядан ўтказилади;
- 2 та катта, 1 та ўрта ва 9 та шаҳар жойлашувлари таҳлил қилинади ва иқтисодий жиҳатдан бундай ҳолат қанчалик иқтисодий тараққиётга мувофиқлиги ўрганилади;
- Қарши шаҳри атрофидаги аҳолиси 5 500 кишидан ортиқ бўлган қишлоқ аҳоли пунктлари (Қозикент, Узуннаво, Тўқманғит) урбанизация жараёнлари янада жадаллаштирилади ва уларни Қарши шаҳрига қўшиш мувофиқлиги ўрганилади;
- Китоб шаҳри атрофидаги аҳолиси 4200 дан зиёд бўлган қишлоқ аҳоли пунктларида (Минглар, Гулгунпўшт, Жарқўрғон) урбанизация жараёнлари янада жадаллаштирилади ва уларга шаҳар мақомини бериш бўйича ишлар олиб борилади;
- агломерация ва ички миграция жараёнларини ҳисобга олган ҳолда аҳолиси 1,43 миллиондан зиёд бўлган шаҳар аҳоли пунктларининг ихчамлиги ва қулай жойлашувини таъминлаш бўйича ишлар олиб борилади.
Бунда:
- БМТ Хабитат дастури, хорижий давлатлар тажрибаси ва тегишли имзоланган халқаро шартномалар ва меморандумлар кўзда тутилади;
- ҳудудларнинг бош режалар билан таъминлангани, архитектуравий дизайн-кодлар мавжудлиги ва уларга риоя қилиниши, инфратузилма ва бино-иншоотлар фонди энергосамарадорлиги, ҳудудлар кўкаламзорлиги ва ободонлаштириш даражаси, шаҳарларнинг инфратузилма билан таъминлангани инобатга олинган ҳолда объектлар жойлаштирилади ва лойиҳалаштирилади;
- шаҳарларни зоналарга бўлиш орқали ички ҳудудларни тегишли тоифаларга ажратган ҳолда баҳолаш мақсадида 6 та зонага (яшаш жойлари, йўл чизмалари, кўкаламзорлаштириш, маъмурий, бизнес инфратузилмаси, ижтимоий инфратузилмалар, жамоат майдонлари) бўлиш ва уларни баҳолаш ишлари амалга оширилади.
Вилоят ҳокими дунёда «миллионер шаҳар»ларнинг ўз статуси борлигини таъкидлаб, «Ҳар қандай бизнесмен бирор туманга пул қўйишдан олдин аҳолиси қанчалигига қизиқади. Меҳнат ресурси бойми, йўқми, деб сўрайди. Одам кўп бўлса, бу ерга пул тикади. Нега тикади, чунки шаҳарда кўп одам бўлса, кўп ейди, кўп одам кириб-чиқади. Шунинг учун ҳам миллионли шаҳарнинг статуси ўзгача. Шунинг учун Самарқанд шаҳри миллионли шаҳар бўлади», — деб айтганди.
Президент Шавкат Мирзиёев 2021 йилнинг апрелида Самарқанд вилоятига ташрифи доирасида Самарқанд майдони яқин атрофдаги бешта туман ҳудудларининг бир қисми қўшилиши ҳисобига амалдаги 12,4 минг гектардан 30,5 минг гектарга кенгайишини билдирган.
Изоҳ (0)