27-dekabr kuni Seul shahrida O‘zbekiston Favqulodda vaziyatlar vazirligi ehtiyojlari uchun sakkiz dona maxsus yong‘inga qarshi avtomobil va tibbiy jihozlar, shuningdek, himoya vositalari va uskunalarni beg‘araz topshirish marosimi bo‘lib o‘tdi, deb xabar beradi “Dunyo” agentligi.
Ma’lum qilinishicha, marosimda O‘zbekistonning Seuldagi elchixonasi, Janubiy Koreya Milliy yong‘in xavfsizligi xizmati, Janubiy Koreya—O‘zbekiston biznes uyushmasi va mamlakatning yong‘in xavfsizligi assotsiatsiyasi vakillari ishtirok etgan.
Uskunalarni 2022-yil boshida O‘zbekistonga yetkazib berish rejalashtirilgan. Shuningdek, Janubiy Koreya tomoni O‘zbekiston hududida ham, Janubiy Koreyada ham ushbu uskunalardan foydalanish bo‘yicha o‘quv kurslarini tashkil etishni rejalashtirmoqda.
Tadbir davomida tomonlar ikki davlat o‘rtasida yong‘in xavfsizligi sohasidagi hamkorlikni rivojlantirishda ijobiy dinamikani qayd etgan. Xususan, O‘zbekiston FVV Yong‘in xavfsizligi va favqulodda vaziyatlar ilmiy-tadqiqot instituti bilan Janubiy Koreya yong‘in xavfsizligi instituti o‘rtasida hamkorlik memorandumi imzolanib, muntazam tajriba almashish maqsadida idoralararo hamkorlikning bevosita aloqalari yo‘lga qo‘yilgan.
Ayni paytda Janubiy Koreya tomoni bilan Toshkent viloyatida yong‘in xavfsizligi bo‘yicha o‘quv majmuasini qurish bo‘yicha investitsiya loyihasini amalga oshirish masalasi ishlab chiqilmoqda. Bundan tashqari, kadrlarni tayyorlash va qayta tayyorlash, jumladan, O‘zbekiston FVV mutaxassislarini Janubiy Koreyadagi yong‘inga qarshi tayyorgarlik bo‘yicha ta’lim muassasalarida tayyorlash sohasida hamkorlikni faollashtirish rejalashtirilgan.
Eslatib o‘tamiz, 2020-yil aprel oyining yakunida esa Janubiy Koreya tomonidan O‘zbekistonga umumiy qiymati 250 ming AQSh dollariga teng bo‘lgan diagnostika to‘plamlari taqdim etildi. Iyun oxirlarida mamlakat koronavirusga qarshi kurashish uchun O‘zbekistonga 5 million dollar ajratgandi. 2021-yilning oktabrida Janubiy Koreya O‘zbekistonga koronavirusga qarshi kurash uchun yana 5 million dollar ajratgan.
Izoh (0)