2020 йилнинг февраль ойида Тошкентнинг Яккасарой туманидаги 81 туп дарахт кесилгани учун қурувчидан ундирилган қарийб 2 миллиард сўм Ўзбекистон Экология ва атроф-муҳитни муҳофаза қилиш қўмитаси ҳисоб рақамига ўтказиб берилди. Бу ҳақда пойтахт Экология бошқармаси хабар берди.
Маълум қилинишича, 81 туп дарахт ноқонуний кесилгани юзасидан ҳуқуқбузар Building and Supplies МЧЖ томонидан етказилган жами моддий зарар — 1 891 263 000 сўм Ўзбекистон Экология ва атроф-муҳитни муҳофаза қилиш давлат қўмитаси ҳисоб рақамига ўтказилган.
Эслатиб ўтамиз, 2020 йилнинг февралида Building and Supplies компанияси Юнус Ражабий кўчасидаги бир нечта турар жой бинолари орасидаги 0,5 гектар майдонга кўп қаватли уйлар қуришни режалаштирган эди. Компания амалдаги мораторийга қарамасдан, 81 та дарахтни кесгани жамоатчилик норозилигига сабаб бўлган ва шаҳар раҳбарияти ҳамда ҳукуматининг эътиборини тортганди.
Дарахтларни кесишга рухсат берган Яккасарой туман ҳокимининг ўринбосари Абдувосилхон Сатторовга нисбатан Жиноят кодексининг 205-модда (ҳокимият ёки мансаб ваколатини суиистеъмол қилиш) 2-қисми «а» банди, Building and Supplies таъсисчиси Абдураҳим Қодировга нисбатан эса 198-модда (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) 2-қисми билан билан жиноят иши қўзғатилган.
Бироқ орадан бир ярим йилдан зиёдроқ вақт ўтса ҳам, ундирилган маблағлар Экология қўмитаси ҳисобига ўтказиб берилмади. Декабрь ўрталарида мазкур масалага Олий Мажлис Қонунчилик палатаси депутати Расул Кушербаев эътибор қаратди. У Тошкент шаҳар прокуратураси ҳамда Экология ва атроф-муҳитни муҳофаза қилиш давлат қўмитасига жиноят иши натижаларига аниқлик киритиш мақсадида расмий сўровлар юборган. Давлат экология қўмитаси депутатнинг сўровига ундирилган маблағлар ҳамон Тошкент прокуратураси ҳисобида эканини маълум қилган.
Пойтахт прокуратураси Расул Кушербаев 9 ноябрь куни йўллаган сўровга жавоб қайтармаган. Бу ҳақда ўзининг Telegram каналида хабар берган депутат кўп ўтмай постни ўчириб ташлаган ва босим бўлгани тўғрисидаги саволларга изоҳ бермаган.
Бош прокуратуранинг нашрга тасдиқлашича, 1,89 миллиард сўм ростан ҳам шаҳар прокуратураси ҳисобида турибди. Идора маълумотларига кўра, жиноят иши бўйича тергов 2020 йилнинг 10 июлида Жиноят-процессуал кодексининг 364-модда (дастлабки терговни тўхтатиш асослари ва тартиби) 1-қисми билан тўхтатилган.
Депутат сўровидан кейин 2021 йил 5 декабрь куни терговолди суриштирувлари қайта тикланган.
Изоҳ (0)