Toshkentning Yunusobod tumani hududidan o‘tgan Ahmad Donish ko‘chasidagi yo‘lning cho‘kish holati yuzasidan jinoyat ishi qo‘zg‘atildi. Bu haqda DXX matbuot xizmati xabar berdi.
2021-yilning mart oyida Toshkent shahrining Yunusobod tumanida hududidan o‘tgan Ahmad Donish ko‘chasidagi avtomobil yo‘lining 500 metr qismida 40-50 santimetrgacha cho‘kish holati yuzaga kelgani tufayli, ushbu hududda transport vositalarining harakati vaqtincha cheklangan edi. Holat yuzasidan Davlat xavfsizlik xizmati hamda prokuratura organlari tomonidan o‘rganish ishlari olib borilgan.
O‘rganishlar davomida mutasaddi tashkilotlar tomonidan Yunusobod—Turkiston yerosti metro konstruksiyasining atrofini va yon qismlarini tuproq bilan qayta to‘ldirish va zichlash ishlari sifatli bajarilmagani, texnik nazorat talab darajasida olib borilmagani hamda avtomobil yo‘lini rekonstruksiya qilishda loyihalashtirish ishlari noto‘g‘ri olib borilgani sababli yuqoridagi cho‘kish holati yuzaga kelib, natijada davlatga 4,5 milliard so‘m miqdorida zarar yetkazilgan.
Hozirda holat bo‘yicha respublika Transport prokuraturasi tomonidan Toshkent metropoliteni liniyalarini qurish direksiyasi va Toshkent shahar hokimligi Yagona buyurtmachi xizmati injiniring kompaniyasi mansabdor shaxslariga nisbatan Jinoyat kodeksining 207-moddasi (mansabga sovuqqonlik bilan qarash) 1-qismi bilan jinoyat ishi qo‘zg‘atilib, tergov harakatlari olib borilmoqda.
Shuningdek, Ahmad Donish ko‘chasida yuzaga kelgan holatni bartaraf etish bo‘yicha mutasaddi idoralar tomonidan tegishli chora-tadbirlar tashkil etilmoqda.
Ma’lumot uchun, 2020-yilning avgustida poytaxtdagi Ahmad Donish ko‘chasining Amir Temur ko‘chasidan Toshkent xalqa avtomobil yo‘ligacha bo‘lgan 2,2 kilometr qismi 6 qatorli qilib qayta qurilgandi. Avgust oxirida prezident Shavkat Mirziyoyev ushbu ko‘chada amalga oshirilgan qurilish va obodonlashtirish ishlarini borib ko‘rgan edi.
Eslatib o‘tamiz, Toshkent shahar bosh imom-xatibi, o‘sha paytda Yunusobod tumanidagi “Mirza Yusuf” (“Bodomzor”) jome masjidi imom-xatibi bo‘lgan Sayyid Rahmatulloh Termiziy o‘z ma’ruzasida yo‘l qurilishi sohasidagi korrupsiya sababli yangi qurilgan yo‘llar ham uzoq turmasligi, ko‘p vaqt o‘tmay yomon ahvolga kelib qolishi haqida gapirgandi.
“Kattasidan tortib oddiy ishchisigacha ‘Alloh meni ko‘rib turibdi’, deb yo‘l qursa nima bo‘ladi, birodarlar? Yo‘llar yomg‘ir yog‘gach cho‘kib ketmaydi, yangi yo‘l qurilgach yil bo‘yi remont bo‘lib yotmaydi” — degan edi u.
Transport vazirligi huzuridagi Avtomobil yo‘llari qo‘mitasi imomning ma’ruzasidan norozi bo‘lib Musulmonlar idorasiga shikoyat yo‘llagandi. Qo‘mita yo‘l qurilishiga ajratiladigan mablag‘lar talon-toroj qilinishi haqida gapirgan imom-xatibning ijtimoiy tarmoqlarda tarqalgan ma’ruzasiga raddiya berilishini so‘ragan. Biroq imom so‘zlarida biror bir tashkilot va mansabdorni tilga olmaganini aytib, raddiya berishga majbur emasligini ta’kidlagandi.
Izoh (0)