27 декабрь куни Сеул шаҳрида Ўзбекистон Фавқулодда вазиятлар вазирлиги эҳтиёжлари учун саккиз дона махсус ёнғинга қарши автомобиль ва тиббий жиҳозлар, шунингдек, ҳимоя воситалари ва ускуналарни беғараз топшириш маросими бўлиб ўтди, деб хабар беради «Дунё» агентлиги.
Маълум қилинишича, маросимда Ўзбекистоннинг Сеулдаги элчихонаси, Жанубий Корея Миллий ёнғин хавфсизлиги хизмати, Жанубий Корея—Ўзбекистон бизнес уюшмаси ва мамлакатнинг ёнғин хавфсизлиги ассоциацияси вакиллари иштирок этган.
Ускуналарни 2022 йил бошида Ўзбекистонга етказиб бериш режалаштирилган. Шунингдек, Жанубий Корея томони Ўзбекистон ҳудудида ҳам, Жанубий Кореяда ҳам ушбу ускуналардан фойдаланиш бўйича ўқув курсларини ташкил этишни режалаштирмоқда.
Тадбир давомида томонлар икки давлат ўртасида ёнғин хавфсизлиги соҳасидаги ҳамкорликни ривожлантиришда ижобий динамикани қайд этган. Хусусан, Ўзбекистон ФВВ Ёнғин хавфсизлиги ва фавқулодда вазиятлар илмий-тадқиқот институти билан Жанубий Корея ёнғин хавфсизлиги институти ўртасида ҳамкорлик меморандуми имзоланиб, мунтазам тажриба алмашиш мақсадида идоралараро ҳамкорликнинг бевосита алоқалари йўлга қўйилган.
Айни пайтда Жанубий Корея томони билан Тошкент вилоятида ёнғин хавфсизлиги бўйича ўқув мажмуасини қуриш бўйича инвестиция лойиҳасини амалга ошириш масаласи ишлаб чиқилмоқда. Бундан ташқари, кадрларни тайёрлаш ва қайта тайёрлаш, жумладан, Ўзбекистон ФВВ мутахассисларини Жанубий Кореядаги ёнғинга қарши тайёргарлик бўйича таълим муассасаларида тайёрлаш соҳасида ҳамкорликни фаоллаштириш режалаштирилган.
Эслатиб ўтамиз, 2020 йил апрель ойининг якунида эса Жанубий Корея томонидан Ўзбекистонга умумий қиймати 250 минг АҚШ долларига тенг бўлган диагностика тўпламлари тақдим этилди. Июнь охирларида мамлакат коронавирусга қарши курашиш учун Ўзбекистонга 5 миллион доллар ажратганди. 2021 йилнинг октябрида Жанубий Корея Ўзбекистонга коронавирусга қарши кураш учун яна 5 миллион доллар ажратган.
Изоҳ (0)