Navoiy viloyati Karmana tumani xalq ta’limi bo‘limi mudiri vazifasini vaqtincha bajaruvchi Nasiba Sodiqova o‘z faoliyatida yo‘l qo‘ygan kamchiliklari sabab ishdan olindi. Bu haqda Xalq ta’limi vazirligi axborot xizmati xabar berdi.
Ma’lum qilinishicha, tuman xalq ta’limi bo‘limi Xalq ta’limi vazirligining topshirig‘iga zid ravishda chet tili o‘qituvchilariga tarqatilayotgan 1 million so‘m mablag‘ni naqd ko‘rinishida berib, bozor narxi 60 ming so‘m bo‘lgan kitobni 483 ming so‘mdan pullamoqchi bo‘lgan.
Shu bois vazirlikning bir necha bor mazkur holat yuzasidan ogohlantirishiga qaramay, ushbu holatga yo‘l qo‘ygani uchun tuman xalq ta’limi bo‘limi mudiri vazifasini vaqtincha bajaruvchi Nasiba Sodiqova o‘z vazifasidan ozod etilgan. Shuningdek, tuman XTBning bosh hisobchisi va xorijiy tillar metodistini lavozimidan ozod etish yuzasidan vazirlik rahbariyati tomonidan topshiriq berilgan.
“Xalq ta’limi vazirligi yuqoridagi kabi holatlar qaytarilib, o‘z tasdig‘ini topgan taqdirda keskin va ayovsiz chora ko‘rilishi haqida yana bir bor ogohlantiradi”, — deyiladi xabarda.
Tavsiya etiladigan darslik va o‘quv qo‘llanmalarining ro‘yxati hamda ularni sotib olganlik to‘g‘risida hisobot shakli Xalq ta’limi vazirligi va Vazirlar Mahkamasi huzuridagi Xorijiy tillarni o‘rganishni ommalashtirish agentligi tomonidan belgilanishi ko‘rsatilgan.
Avvalroq Samarqandda tadbirkordan 2000 dollar pora olgan xalq ta’lim bo‘limi mutaxassisi ushlangani, Samarqandda tuman XTB mudiri o‘rinbosari 300 dollar pora bilan qo‘lga tushgani to‘g‘risida xabar berilgandi.
Izoh (0)