Дунё ва ўзбек спортига оид 27 декабрнинг энг муҳим хабарлари дайжести билан танишинг.
Ўзбекистон
Сречко Катанец Японияга қарши ўйин учун қайдномани эълон қилди
Япониянинг «Саитама» стадионида 21 январь кунига белгиланган ўйинга 23 нафар футболчи жалб этилган. Эътиборлиси, қайдномада бирорта ҳам легионер футболчи йўқ.
Таркибга «Пахтакор» ва «Насаф»дан 8 нафар, «Локомотив»дан 4 нафар футболчи жалб этилган бўлса. Қолган уч футболчи «ОКМК», «Навбаҳор» ва «Бунёдкор» клубларидан олинган.
Қайд этиш керак, Японияда айни вақтда чет элдан ташриф буюрувчилар учун қатъий карантин чекловлари мавжуд.
«Қизилқум» бош мураббийи депутатга айланди
Ҳамиджон Актамов Навоий вилояти Кармана тумани кенгашига депутат этиб сайланди. Либерал демократик партия аъзоси бўлган Актамов беш номзод орасида 78,5% овоз билан депутатликка сайланган.
Эслатиб ўтамиз, 2020 йилда «ОКМК» бош мураббийи Миржалол Қосимов Тошкент шаҳар кенгаши депутатлигига сайланганди.
Ҳарбий дзюдочилар тақдирланди
Франциянинг Париж шаҳрида бўлиб ўтган ҳарбийлар ўртасидаги Жаҳон чемпионатида совриндор бўлган ўзбекистонлик дзюдочилар тақдирланди.
Ўзбекистон Республикаси Мудофаа вазирлиги ҳамда мамлакат дзюдо федерацияси раҳбарияти Франциядаги чемпионатда умумжамоа ҳисобида биринчи ўринни эгаллаган Ўзбекистон терма жамоаси вакиллари билан учрашди ва уларга эсдалик совғаларини тақдим этди.
Эслатиб ўтамиз, ўзбекистонлик дзюдочилар яккалик баҳсларда тўртта олтин, битта бронза медалига эга чиққан бўлса, жамоавий беллашувларда бронза медалини қўлга киритди.
Жаҳон
Америкалик боксчи оила аъзолари кўз ўнгида ўлдириб кетилди
Бокс бўйича оғир вазн тоифасида ҳаракат қилувчи Дэнни Келли (10-3-1, 9 КО) АҚШда ўлдириб кетилди. Боксчи оила аъзолари билан автомобилда кетаётган вақтда номаълум кимсалар томонидан отиб кетилган.
Полиция маълумотларига кўра, боксчининг машинаси бошқа автомобиль томонидан тўхтатилган ва унинг ҳайдовчиси ўқ узган. Тиббиёт ходимлари спортчининг жонини сақлаб қололмаган.
Машинада Келлининг қайлиғи ва уч нафар фарзанди бўлган. Уларга жабр етмаган.
Боксчи сўнгги жангини 2019 йилнинг октябрь ойида ўтказганди.
Пирло Португалия грандини бошқариши мумкин
«Ювентус» собиқ бош мураббийи Андреа Пирло фаолиятини Португалияда давом эттириши мумкин.
Calciomercato нашри хабарига кўра, 42 ёшли мутахассис «Бенфика» қизиқиш доирасига тушган.
Португал клуби президенти Руй Кошта бир қанча номзодлар қаторида италиялик мутахассис вариантини ҳам кўриб чиқмоқда. Қайд этиш ўринли, Кошта ва Пирло бир вақтлар «Милан»да бирга тўп сурган.
«Бенфика» Чемпионлар Лигаси 1/8 финалига чиққанига қарамай амалдаги бош мураббий Хорхе Жезуснинг жамоадаги келажаги ноаниқлигича қолмоқда.
Ферран Тореснинг «Барселона» билан 5 йиллик шартнома имзолайди
Ярим ҳимоячи Ферран Торреснинг «Манчестер Сити»дан «Барселона»га ўтиши якунланиш арафасида.
Журналист Фабрицио Романонинг хабар беришича, испаниялик футболчи 27 декабрь куни тиббий кўрикдан ўтади ва келишув имзоланади. Торреснинг ўзи агентлари билан биргаликда Барселонага учиб келган.
21 ёшли футболчи «кўк-анорранглилар» билан 5 йилга мўлжалланган шартнома имзолайди. Трансфер суммаси 55 миллион еврони ташкил қилади, шунингдек, яна 10 миллион евро бонус ҳам кўзда тутилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)