“O‘zgidromet” 21-dekabr kuni shamol tezligi ba’zi joylarda 25-28 metr/soniyagacha kuchayib, Qoraqalpog‘iston, Xorazm, Buxoro, Navoiy viloyatlarida va respublikaning cho‘l hududlarida chang bo‘roni va g‘uborlar ko‘tarilishi mumkinligi to‘g‘risida xabar bergandi. Ayni paytda Qashqadaryo viloyatida ushbu tabiat hodisasi kuzatilmoqda. Sog‘liqni saqlash vazirligining ma’lum qilishicha, chang bo‘roni munosabati bilan aholiga tibbiy yordam ko‘rsatish uchun barcha zarur choralar ko‘rilgan.
Ma’lum qilinishicha, Respublika shoshilinch tibbiy yordam ilmiy markazi va uning hududlardagi 13 ta filiali hamda 179 ta aholi punktida joylashgan subfiliallari doimiy shay holatda.
Bundan tashqari, mamlakat bo‘ylab 2861 ta tez tibbiy yordam brigadasi zarur dori-darmonlar bilan yetarli miqdorda to‘liq ta’minlangan. Shoshilinch va tez tibbiy yordam tizimida faoliyat ko‘rsatayotgan qariyb 17 ming nafarga yaqin shifokor va 52 ming nafardan ziyod hamshiralarga zarur ko‘rsatmalar berilgan.
“Qolaversa, aholi Sog‘liqni saqlash vazirligining 1003 qisqa raqamli Call-markazining malakali mutaxassislaridan changli havodan qanday himoyalanish bo‘yicha tun-u kun kerakli maslahat va tavsiyalar olishlari mumkin”, — deyiladi xabarda.
Ta’kidlanishicha, xona yoki inshootlarni nam latta bilan tozalab turish, uy yoki bino ichiga, atrofiga suv solingan idishlar qo‘yish chang darajasini pasaytirishga xizmat qiladi. Qolaversa, bunday vaziyatda nam sochiqlarni osib qo‘yish, konditsioner va havoni tozalash tizimlari ham asqatadi.
Derazalarni yopiq holda saqlash, ko‘proq suv ichish, tez-tez dush qabul qilish nafas olishni yengillashtiradi. Og‘iz va burun bo‘shlig‘ini tuzli eritma bilan yuvib turish ham katta samara beradi.
Ochiq havoda yurganda, albatta, tibbiy niqob taqib yurish va ularni har ikki soatda almashtirish shart. Yosh bolalar, homilador ayollar va yoshi katta insonlar ham bunday vaziyatda ehtiyotkor bo‘lishlari tavsiya etiladi.
Agar fuqarolarda tashqi muhitdagi changlar tufayli nafas qisishi, burun bitishi, aksirish, burun oqishi, ko‘zlarda qichishish va qizarish, tomoqda kuchli qichishish, qichishish bilan kuzatiladigan yo‘tal belgilari yuzaga kelsa, tezda oilaviy shifokor punkti, oilaviy poliklinikalarga murojaat qilishlari lozimligi qayd etilgan.
Eslatib o‘tamiz, O‘zbekistonga 4-noyabr kuni Ural tomondan sovuq havo oqimi, u bilan birga kuchli shamol kirib kelishi oqibatida (shamol tezligi Toshkentda soniyasiga 15 metrgacha, Buxoro, Navoiy, Jizzax viloyatlarida esa 25 metrgacha kuchaygan) mamlakatning bir qator hududlarida, xususan, Toshkent shahrida chang-qum bo‘ronlari kuzatilgandi. “O‘zgidromet” ma’lumotlariga ko‘ra, shu kuni soat 21:00-23:00 oralig‘ida Toshkent havosidagi chang ruxsat etilgan miqdordan 30 barobargacha oshib ketdi va havosining ifloslanishi darajasi bo‘yicha O‘zbekiston poytaxti dunyoda birinchi o‘ringa chiqdi. Chang 8-noyabrga kelibgina chekindi, ungacha poytaxt aholisi salkam to‘rt kutilmagan noqulaylik girdobida qoldi (masalan, Sog‘liqni saqlash vazirligi ma’lumotlariga ko‘ra, 5-noyabrdan 6-noyabr soat 6:00 ga qadar tez yordamga bo‘lgan 4110 ta chaqiriqdan 709 tasida fuqarolar nafas olish bilan bog‘liq muammolardan shikoyat qilgan).
Shuningdek, 19-dekabr kuni Samarqand va Qashqadaryo viloyatlarining ayrim hududlarida kuchli shamol va changli bo‘ron kuzatilgan edi. O‘sha kuni soat 13 dan 15 gacha Toshkent, Jizzax, Sirdaryo viloyatlarida yomg‘ir yog‘ishidan oldin shamol kuchayishi, ba’zi joylarda qisqa muddatga changli bo‘ronlar ko‘tarilishi mumkinligi ma’lum qilingandi.
Izoh (0)