Тошкент шаҳридаги «Газета корпуси» номи билан танилган Матбуот уйининг маъмурий биноси сотилмайдиган бўлди. Бу ҳақда ЎзА директори ўринбосари Хушнудбек Худойбердиев Ўзбекистон президентининг матбуот котиби Шерзод Асадовга таяниб маълум қилди.
21 декабрь куни президент матбуот котиби Шерзод Асадов бир гуруҳ босма матбуот нашрлари бош муҳаррирлари билан учрашган. Унда босма матбуот — газета ва журналлар фаолиятига оид муаммолар, янги таклифлар муҳокама қилинган.
Шерзод Асадовнинг маълум қилишича Матбуот уйи биноси узил-кесил сотувдан олинган. Бино келгусида оммавий ахборот воситалари, жумладан, босма нашрларга қолдирилади. «Gazeta.uz»нинг ёзишича, бино ҳозирда Ахборот ва оммавий коммуникациялар агентлиги биносида жойлашган Журналистлар уюшмасига берилиши мумкин.
Шу билан бирга, нашрнинг манбаларига кўра, ЎзАни Матбуот уйига кўчириб ўтказиш варианти ҳам кўриб чиқилмоқда, бунда бино унинг балансига ўтказилади. Бу каби ҳолатда ЎзАнинг биноси Давлат активларини бошқариш агентлигига ўтади. Бироқ ҳозирча бу борада тегишли қарор қабул қилинмаган.
Шерзод Асадовнинг сўзларига кўра, ушбу масала президент томонидан назоратга олинган ва бино замонавий талаблар асосида қайта қурилади ҳамда оммавий ахборот воситалари, шунингдек, Журналистлар уюшмаси фойдаланиши учун топширилади.
Бундан ташқари, учрашувда ОАВлар, босма нашрлар ҳамда Журналистлар уюшмаси фаолиятини қўллаб-қувватлаш бўйича махсус қарор лойиҳалари тайёрланаётгани маълум қилинган.
Маълумот учун, Матбуот уйининг умумий майдони 0,82 гектар бўлиб, бино-иншоот қисми 18 142 метр квадратни ташкил этади. Мазкур объект 2018 йилнинг апрель ойида ҳам сотувга қўйилган эди. Ўшанда Тошкент шаҳрига янги тайинланган Жаҳонгир Ортиқхўжаев бинонинг аукцион савдосида сотилишини тўхтатган эди.
Кейинчалик 2019 йил ноябрида Тошкент шаҳри марказида жойлашган Матбуот уйи биноси 18,75 миллиард сўм нарх билан иккинчи марта аукционга қўйилган. Аммо бу маълумот очиқ аукцион сайтидан олиб ташланган. 2021 йилнинг ноябрь охирларида Давлат активларини бошқариш агентлиги Матбуот уйининг давлат активлари бўйича оммавий савдо жараёнлари бошланганини эълон қилганди.
Изоҳ (0)