Namanganning turizm salohiyatidan yetarlicha foydalanilmayapti. Bu haqda viloyat hokimi Shavkat Abdurazzaqov xalq deputatlari viloyat kengashining 27-sessiyasidagi murojaati davomida ma’lum qildi, deya xabar beradi “Daryo” muxbiri Azizbek Abduvaliyev.
“Namangan turizm borasida juda katta salohiyatga ega. Afsuski, bu boradagi imkoniyatlarimizni hali to‘liq safarbar etganimiz yo‘q. Mazkur bo‘shliqqa barham berish maqsadida Chortoq tumani ekoturizm zonasiga, Chodak, Nanay va Olmazor esa turizm qishloqlariga aylantiriladi. Turizm qishloqlaridagi oilaviy mehmon uylari soni 300 taga, turoperator hamda turagentlar soni esa 30 taga yetkaziladi. Pop, Chortoq, Chust, Kosonsoy va Yangiqo‘rg‘on tumanlari turizm yo‘nalishiga ixtisoslashtirilib, 25,5 milliard so‘mlik 22 ta loyiha amalga oshiriladi”, — dedi Shavkat Abdurazzaqov.
Viloyat hokimining qayd etishicha, Namanganda turizm xizmatlari eksporti hajmini 10 million dollar, viloyatga keluvchi turistlar oqimini esa 3 million kishiga yetkazish ko‘zda tutilgan. 2021-yilda bu ko‘rsatkichlar tegishli ravishda 7,6 million dollar va 1,7 million kishini tashkil etdi.
Murojaatda viloyatda e’tibordan chetda qolgan 5 ta madaniy meros obyekti restavratsiya qilinishi hamda ularga olib boruvchi infratuzilmalar tiklanishi haqida ham so‘z bordi. Jumladan, Boborahim Mashrabning ustozi Mulla Bozor Oxund maqbarasi rekonstruksiya qilinib, ziyoratgohga aylantiriladi. “Qodirxo‘ja eshon” uyi arxitektura yodgorligidagi 10 mingta nodir topilma va buyumlarni saqlash hamda namoyish qilish uchun yangi Adabiyot va san’at muzeyi tashkil etiladi.
Izoh (0)