Наманганнинг туризм салоҳиятидан етарлича фойдаланилмаяпти. Бу ҳақда вилоят ҳокими Шавкат Абдураззақов халқ депутатлари вилоят кенгашининг 27-сессиясидаги мурожаати давомида маълум қилди, дея хабар беради «Дарё» мухбири Азизбек Абдувалиев.
«Наманган туризм борасида жуда катта салоҳиятга эга. Афсуски, бу борадаги имкониятларимизни ҳали тўлиқ сафарбар этганимиз йўқ. Мазкур бўшлиққа барҳам бериш мақсадида Чортоқ тумани экотуризм зонасига, Чодак, Нанай ва Олмазор эса туризм қишлоқларига айлантирилади. Туризм қишлоқларидаги оилавий меҳмон уйлари сони 300 тага, туроператор ҳамда турагентлар сони эса 30 тага етказилади. Поп, Чортоқ, Чуст, Косонсой ва Янгиқўрғон туманлари туризм йўналишига ихтисослаштирилиб, 25,5 миллиард сўмлик 22 та лойиҳа амалга оширилади», — деди Шавкат Абдураззақов.
Вилоят ҳокимининг қайд этишича, Наманганда туризм хизматлари экспорти ҳажмини 10 миллион доллар, вилоятга келувчи туристлар оқимини эса 3 миллион кишига етказиш кўзда тутилган. 2021 йилда бу кўрсаткичлар тегишли равишда 7,6 миллион доллар ва 1,7 миллион кишини ташкил этди.
Мурожаатда вилоятда эътибордан четда қолган 5 та маданий мерос объекти реставрация қилиниши ҳамда уларга олиб борувчи инфратузилмалар тикланиши ҳақида ҳам сўз борди. Жумладан, Бобораҳим Машрабнинг устози Мулла Бозор Охунд мақбараси реконструкция қилиниб, зиёратгоҳга айлантирилади. «Қодирхўжа эшон» уйи архитектура ёдгорлигидаги 10 мингта нодир топилма ва буюмларни сақлаш ҳамда намойиш қилиш учун янги Адабиёт ва санъат музейи ташкил этилади.
Изоҳ (0)