Qashqadaryo viloyatida 2021-yil davomida “ayollar daftari”, “yoshlar daftari” va “temir daftar”ga kiritilgan fuqarolarga 83 milliard so‘mlik yordam berilgani ma’lum bo‘ldi. Bu haqda viloyat hokimi Murodjon Azimovning 2021-yilgi ijtimoiy-iqtisodiy rivojlanish yakunlari hamda 2022-yil uchun belgilangan vazifalar yuzasidan aholiga murojaatnomasida aytib o‘tildi, deya xabar berdi “Daryo” muxbiri.
Qayd etilishicha, viloyatda “temir daftar”da turgan 13 mingga yaqin kam ta’minlangan oilalarni ijtimoiy qo‘llab-quvvatlash uchun “Saxovat va ko‘mak” jamg‘armasi hisobidan 22 milliard so‘m mablag‘ yo‘naltirilgan. Shuningdek, ushbu daftardagi 11 ming 686 ta oilaning 25 ming 176 nafar 18 yoshga to‘lmagan farzandiga 12 milliard 588 million so‘mlik bir martalik yordam ko‘rsatilgan.
“ ‘Ayollar daftari’ bilan ishlash tizimi doirasida 71 mingdan ziyod xotin-qizlarga 25 milliard so‘mlik manzilli yordam ko‘rsatildi. Jumladan, 26 mingga yaqin xotin-qizlar bandligi ta’minlandi, 5,9 mingdan ziyodi tadbirkorlik bo‘yicha o‘qitildi hamda 4,5 ming nafari 63 milliard so‘mlik imtiyozli kreditlar ajratildi.
840 nafar I guruh nogironligi bo‘lgan xotin-qizlarning uy-joylari ta’mirlab berildi, noturar joylarda va ijarada yashab kelayotgan 257 nafar ayol uy-joy bilan ta’minlanib, uy-joyga muhtoj 106 nafar xotin-qizlarga boshlang‘ich to‘lov to‘lab berildi. 10 500 nafar tibbiy himoyaga muhtoj xotin-qiz statsionar va ambulator sharoitda davolandi”, — dedi viloyat rahbari o‘z murojaatnomasida.
Qo‘shimcha qilinishicha, viloyatda “yoshlar daftari”ga kiritilgan 50 ming 329 nafar yigit-qizlarning 47 ming 517 nafari (94,4 foizi) daftardan chiqarilgan. Daftardagi fuqarolarning 18 992 nafariga 23 milliard 460 million so‘mlik moliyaviy ko‘mak berilib, ijtimoiy qo‘llab-quvvatlangan.
Hokim Murodjon Azimov aholiga murojaatnomasida Qarshi shahridagi “Shodlik” mahallasida joylashgan 2-sonli yotoqxona haqida gapirib, holat uni tashvishga solganini bildirdi. Ayni paytda ushbu yotoqxonada ta’mirlash ishlari olib borilmoqda.
Mavzuga doir:
Izoh (0)