Bugun,

  • USD 11095.31
  • RUB 173.84
  • EUR 10772.44

Qashqadaryo viloyatining Qarshi shahri markazida 69 ta oila “Shodlik” mahallasida joylashgan xarobaga aylangan yotoqxonada istiqomat qiladi. “Daryo”ga murojaat qilgan aholining aytishicha, ular karantin paytida shu xarobasidan ham ajralib qolishi mumkin.

Foto: “Daryo”

“Mamlakatimizda karantin e’lon qilingan bo‘lishiga qaramasdan, shu paytda yashab turgan yotoqxonamizdan chiqib ketishimizni talab qilishmoqda. Biz esa qayerga borishni bilmay, boshimiz qotgan. Viloyat hokimligiga borsak, shahar hokimligiga borishimizni aytishadi. Shahar hokimligiga borsak, bizni eshitishmayapti”, — deydi yotoqxonada yashovchi Nodira Davlatova.

Foto: “Daryo”

Mazkur yotoqxonada yashovchi Nasiba Jalilova hamda Nargiza Namozovalarning aytishicha, bu talab O‘zbekistonda kuchaytirilgan karantin boshlangan kundan beri davom etib kelmoqda.

Foto: “Daryo”

“Karantinda ham tinch qo‘yishmayapti, yotoqxonani sotib olishganini, bizga esa chiqib ketishimiz lozimligini aytishadi. Karantin paytida qayerga ham boramiz?”, — deydi Nargiza Namozova.

Nargiza Namozova

Nargiza Namozova
Foto: “Daryo”

Ushbu yotoqxonada to‘qqiz yildan beri yashab kelayotgan Nasiba Jalilovaning ma’lumot berishicha, mazkur yotoqxona yashovchilarning aksariyati ishsiz. Shu boisdan ham ularni yashab turgan joyidan ajratish, ko‘pchilikning ko‘chada qolishiga sabab bo‘ladi.

Foto: “Daryo”

Foto: “Daryo”

“Pensiyam arzimagan pul, kamligi bois hatto yashashimga ham yetmaydi. Bu yerdan chiqarib yuborishsa, keksa holimga qayerga boraman va kimning uyidan boshpana topaman”, — deydi Nasiba Jalilova.

Foto: “Daryo”

Foto: “Daryo”

“Daryo” muxbiri bilan suhbatlashgan aholining aytishicha, viloyat rahbari Zoir Mirzayev hokimlikka tayinlangach, ushbu yotoqxonada bo‘lgan va xonadon vakillari bilan muloqot qilgan.

Foto: “Daryo”

“2019-yilning noyabr oylari edi. Viloyat hokimi Zoir Mirzayev va shahar hokimi Normo‘min Xolboyev yotoqxonamizga kelib yashash sharoitimizni ko‘zdan kechirdi. Qishki mavsum uchun yotoqxona derazalari va eshiklariga sellofan qoqib, qishki mavsumga tayyorlash lozimligini aytdi. Va bu yerda yashovchilar uchun munosib shart-sharoit yaratilishini bildirdi”, — deydi aholi vakillari.

Foto: “Daryo”

Murojaatchilar yotoqxonaga viloyat rahbarining kelishi ularga katta umid bag‘ishlaganini aytmoqda.

Foto: “Daryo”

“Viloyat rahbari kelib-ketgach, sharoitimiz yaxshilanadi, yotoqxonadan chiqib keting, degan dashnomdan qutulamiz deb o‘ylagandik. Ammo berilgan topshiriqqa qaramasdan, shahar hokimi bizning muammomizga e’tibor ham qaratmayapti”, — deydi yotoqxona aholisi.

Foto: “Daryo”

Ma’lum bo‘lishicha, shaharning 4-kichik tumanida joylashgan 2-sonli yotoqxonada 85 ta xona mavjud bo‘lib, shundan 69 tasida 144 nafar aholi istiqomat qiladi. Yotoqxona 2019-yil may oyida besh nafar tadbirkor tomonidan sotib olingan.

Foto: “Daryo”

“Ushbu yotoqxona 2005-yil fuqaro Ozod Umirov rahbarligidagi ko‘kalamzorlashtirish bilan shug‘ullanuvchi tashkilot balansiga xususiy mulk sifatida o‘tkazilgan. Ozod Umirov esa 2019-yil may oyida binoni bizga sotdi”, — deydi yotoqxonani sotib olgan tadbirkorlar vakili Anvar Jovliyev.

Foto: “Daryo”

Ta’kidlanishicha, yotoqxonani sotib olgan tadbirkorlar uni ta’mirlab, xususiy maktab va bog‘chaga aylantirishni maqsad qilgan.

“Viloyat rahbari ushbu yotoqxonani ko‘zdan kechirgach, biz sotib olganimizni, kelajakda xususiy maktab va bog‘cha qurish niyatimiz borligini eshitdi va qo‘llab-quvvatladi, — deydi Anvar Jovliyev. — Shundan so‘ng biz shahar hokimi Normo‘min Xolboyevga murojaat qilib, qurilishimiz kechikib ketayotganini, yotoqxonani bo‘shatib berishlari lozimligini aytdik. Shahar hokimi esa 2020-yil 1-martga qadar kutib turishimizni iltimos qildi. Ammo 2020-yilning iyul oyi keldiki, yotoqxona haligacha bo‘shatilmadi.

“Yotoqxona xususiy mulk sifatida sotilganini to‘g‘ri tushunamiz, ammo biz ham ko‘chada qolmasligimiz kerak-ku. Shahar hokimligi bizga ham ko‘mak berib, imkoniyat yaratishini so‘rayapmiz”, — deydi aholi vakillaridan biri Nargiza Namozova.

Feruza Ro‘ziyeva

Feruza Ro‘ziyeva
Foto: “Daryo”

“Bizga ham ish berishsa, uy olishimiz uchun imtiyoz yaratishsa, qolganini eplaymiz, — deydi mazkur yotoqxonada yashovchi Feruza Ro‘ziyeva. — 11 yildan beri shu yerda yashaymiz. Shuncha payt shu yerda yashab, endi uysiz, joysiz qolish judayam alam qiladi. Eng yomoni turmush o‘rtog‘im ham yo‘q. Yolg‘iz onaman. Aliment puliga ro‘zg‘or tebrataman. Endi karantin payti uydan chiqarib yuborishga harakat qilinishi, bizni qiyin ahvolga solib qo‘ymoqda”.

Guli Qahramonova

Guli Qahramonova
Foto: “Daryo”

“Bir nafar farzandimni otasiz katta qilyapman, kafe va oshxonalarda ishlab pul topardim. Karantin paytida ish ham bo‘lmayapti. Endi esa yashab turgan joyimizdan ham chiqarishga urinishyapti, — deydi Guli Qahramonova. — Shahar hokimligiga murojaat qilib, 15 yildan beri shu yerda yashab kelayotganimni, ish va uy olishimiz uchun imkoniyat berishlarini so‘radim. Hokim o‘rinbosari Alisher Nasimov qo‘pol munosabatda bo‘lib, bizni odam o‘rnida ham ko‘rmadi. Umuman yordam berishni istashmayapti”.

Mamasolih Raimov

Mamasolih Raimov
Foto: “Daryo”

Yotoqxonada yashovchi va ko‘z bo‘yicha birinchi guruh nogironi Mamasolih Raimovning aytishicha, uning shahar hokimligiga qilingan murojaatlari javobsiz qolmoqda.

“Hokimlikka murojaat qilib, birinchi guruh nogironi ekanligimni, yordam berishlarini so‘radim. Ammo hech qanday natija yo‘q”, — Mamasolih Raimov.

Foto: “Daryo”

Qarshi shahar hokimligi axborot xizmatining “Daryo”ga ma’lum qilishicha, karantin paytida yotoqxonada yashovchilarni hech kim bezovta qilmaydi.

Foto: “Daryo”

“Shahar hokimi topshirig‘i bilan yotoqxonada yashovchilar muammosi o‘rganib chiqilmoqda. Hokimlik imkon qadar aholini qo‘llab-quvvatlab, ularga yordam berishni maqsad qilgan. Va’da berib aytamizki, karantin paytida aholini hech kim hech qayerga chiqarmaydi”, — deydi shahar hokimligi axborot xizmati rahbari Umid Jabborov.

“Daryo” voqealar rivojini kuzatishda davom etadi va muammo yakuni xususida ma’lumot beradi.

Izoh
Asosiy yangiliklar
Mahalliy
Elektr va gazdan shikoyat qilgan fuqarolarni qamoq bilan “ogohlantirgan” deputat o‘z xohishiga ko‘ra ariza yozdi
Mahalliy
O‘zbekistonda ko‘chmas mulk, avtomototransportni boshqa shaxsga o‘tkazishda davlat boji miqdorlari kamaytirildi
Mahalliy
Qarshida Cobalt haydovchisi 13 yoshli qizni urib yuborib, voqea joyidan qochib ketdi (video)