Shuhrat Abdurahmonov Andijondagi maktab bitiruvchilarining OTMga kirish ko‘rsatkichini sharmandali deb atadi

Andijon viloyati hokimi Shuhrat Abdurahmonov 2021-yilgi ijtimoiy-iqtisodiy rivojlanish yakunlari hamda 2022-yil uchun belgilangan vazifalar yuzasidan aholi taqdim etgan murojaatnomasida viloyatdagi maktab bitiruvchilarining oliy ta’lim muassasiga kirish bo‘yich ko‘rsatkichlarini sharmandali holat deb atadi. Bu haqda Xalq deputatlari Andijon viloyati kengashining 30-sessiyasida qatnashgan “Daryo” muxbiri xabar bermoqda.

Ta’kidlanishicha, 2020-yilda maktab bitiruvchilarining 13 foizi oliygohlarga o‘qishga kirgan bo‘lsa, joriy yilda bu ko‘rsatkich 26 foizga yetgan. Bundan tashqari, 2 ming 814 nafar 11-sinf bitiruvchilari professional ta’limga o‘qishga qabul qilingan. 2022-yilda bitiruvchilarning oliy ta’lim muassasalariga kirish ko‘rsatkichlarini 30 foizga yetkazish nazarda tutilgan.

Viloyat hokimi ushbu raqamlarga to‘xtalar ekan, ko‘rsatkichlarni sharmandali holat deb atagan.

Prezidentimiz oldimga ikkita — ta’lim va sog‘liqni saqlash sohalari bilan shug‘ullanasan deb juda ham katta vazifalarni qo‘ygan. Ikkala tizimdagi kamchiliklarni hal etish bilan qattiq shug‘ullanyapmiz. Andijonda maktab bitiruvchilarining 26 foizi oliy ta’lim muassalariga kirishi bu sharmandalik.

Dalaga chigit eksang paxta bo‘ladi, maktabga bolamizni bersak ertaga talaba bo‘lib chiqib ketishi kerak. Nima uchun ularga bunday sharoitlarni yaratib beryapmiz? Nima uchun o‘qituvchilarning oyliklarini oyma-oy ta’minlab qo‘yyapmiz? Nima uchun prezidentimiz o‘qituvchilarning oyligini 1000 dollarga chiqaraman deb harakat qilyapti? Natija esa — 26 foiz.

Avvallari paxtada va boshqa ishlarda bo‘ldik deb bahona qilishardi. Bugun nimani bahona qiladi. Axir maktabini ham supurmayapti-ku? Biz ularga 26 foiz oylik to‘lamayapmiz-ku? Yuz foiz, oyma-oy sanab olyapti-ku, oyligini? Bu raqamlardan viloyat hokimi sifatida o‘zim ham uyalaman. Nimaga xususiy maktab quraman degan tadbirkorga yer va kredit beryapmiz, u o‘zi qurib, o‘zi o‘qituvchi olib harakat qilib, 70-80 foiz bolani oliy o‘quv yurtiga kirib ketadigan qilib qo‘ygan, nima uchun davlat maktablari yaratib berilgan sharoitlarning mas’uliyatini, javobgarligini yelkasiga olmayapti? Bundan buyog‘iga bunday ko‘rsatkich bilan maktab direktori yoki boshqasi bo‘lib, bundan tashqari hokim bo‘lib ham ishlashga haqqimiz yo‘q? Ko‘rsatkich 70 foizga chiqmagunicha tinchlanmasligimiz kerak. Buni hamma bilishi kerak.

Shuhrat Abdurahmonov, Andijon viloyati hokimi