Andijonda 2022-yilda 4 ta oliy ta’lim muassasasi tashkil etiladi. Shundan ikkitasi xorijiy universitetlarning filiallari

2022-yilda Andijonda 4 ta oliy ta’lim muassasasi tashkil etiladi. Bu haqda viloyat hokimi Shuhrat Abdurahmonov 20-dekabr kuni viloyat xalqiga qilgan murojaatida ma’lum qildi, deya xabar berdi “Daryo” muxbiri.

Hokim murojaati davomida maktabgacha ta’lim, xalq ta’limi, oliy va o‘rta maxsus ta’lim tizimini yanada rivojlantirish bo‘yicha amalga oshirilayotgan ishlar, erishilgan yutuqlarga to‘xtalib, 2022-yilda oliy ta’lim tizimini rivojlantirish bo‘yicha qilinishi rejalashtirilgan ishlar bilan tanishtirgan.

Ma’lum qilinishicha, 2022-yilda 14 ta davlat-xususiy sherikchilik asosida yirik maktabgacha ta’lim tashkiloti, 306 ta oilaviy bog‘chalar, 4 ta xususiy maktab, 12 ta fizika-matematika, kimyo-biologiya va informatika fanlariga ixtisoslashtirilgan maktablar, Shahrixon tumanida Toshmuhammad Sarimsoqov nomidagi aniq fanlarga ixtisoslashgan maktab, davlat-xususiy sherikchilik asosida 4 ta 1800 o‘rinli talabalar turar joylari, shuningdek, Andijon davlat tibbiyot instituti uchun 1000 o‘rinli, Andijon mashinasozlik instituti uchun 300 o‘rinli o‘quv binolarini foydalanishga topshirish rejalashtirilgan.

Bundan tashqari, 2022-yilda viloyatda 4 ta yangi oliy ta’lim muassasasini tashkil etish mo‘ljallangan.

“2022-yilda Andijon davlat chet tillari instituti (2010-yilda tugatilgan) qayta tashkil etiladi. Bu bo‘yicha prezident qarori loyihasi tayyorlangan bo‘lib, imzolanish arafasida. Shuningdek, tekstil sohasiga mutaxassislarni yetishtirib beruvchi Samo klaster innovatsion texnologiyalar instituti tashkil etiladi.

Bundan tashqari Hindistonning Glokal hamda Axborot texnologiyalar universitetlarining Andijon filiallarini ham tashkil etish rejalashtirilgan bo‘lib, ushbu xorijiy ta’lim muassasalari bilan muzokaralarimiz oxiriga yetgan. Hozirda joylar tanlanmoqda. Nasib qilsa kelasi yildan o‘z faoliyatini boshlaydi. Natijada oliy ta’lim qamrovi 23 foizdan 50 foizga oshadi”, – deydi Shuhrat Abdurahmonov.