Namangandagi prezident Shavkat Mirziyoyev tashrif buyurgan “Bunyodkor” mahallasi uzumchilikka ixtisoslashtiriladi va eksport yo‘lga qo‘yiladi. Bu haqda Yangi Namangan tumani hokimi Jobir Abdullayev xalq deputatlari tuman kengashining 5-sessiyasidagi murojaatnomasida ma’lum qildi, deya xabar beradi “Daryo” muxbiri Azizbek Abduvaliyev.
“Tabiati, dehqonchilik an’analari va aholi istagidan kelib chiqib, tumanimizdagi ‘Bunyodkor’, ‘Yoshlik’ va ‘Mustaqillikning 5 yilligi’ mahallalari uzumchilikka ixtisoslashtirildi. Dastlab Farg‘ona viloyatidan uzum yetishtiruvchi dehqonlar taklif etilib, mahallalarda ushbu yo‘nalishni rivojlantirish bo‘yicha hamkorlikda ish olib borishga kelishib olindi. Keyin Farg‘ona tumanining Oqbuloq qishlog‘iga borib, uzumchilikka ixtisoslashgan fermerlar va xonadonlar faoliyati bilan tanishib keldik. Hozirga qadar uchta mahallamizdagi 870 ta xonadonda so‘ritok o‘rnatish va hosildor uzum ko‘chatlari ekish ishlari amalga oshirildi”, — dedi tuman hokimi.
Jobir Abdullayevga ko‘ra, xonadonlarda bir sotix yerda uzumchilik tashkil etish uchun o‘rtacha 3 million so‘m sarflangan. Uzumlarning “Rizamat ota”, “Damskaya palochka”, “Asl qora”, “Mersedes” kabi xaridorgir navlari tanlab olingan. Ushbu ko‘chatlar 3 yilda hosilga kirishi va shundan so‘ng bir sotix yerdan 20 million so‘mgacha daromad olinishi rejalashtirilmoqda.
“Uzumchilik eng jadal rivojlanadigan hudud ‘Bunyodkor’ mahallasi bo‘ladi. Bu yerda hozirning o‘zida 324 ta xonadon 8,5 gektar maydonda ish boshladi. Yana 28 gektar bog‘ ham bor. Buni inobatga olib, mahallada uzumchilik va bog‘dorchilikni o‘rgatadigan monomarkaz tashkil etiladi. Mahallada yetishtirilgan hosilni saqlash uchun muzlatgichli omborlar qurilib, yetishtirilgan mahsulot eksport qilinadi. Biz uch yildan so‘ng bu yerda uzumchilikning ortidan kamida 5-6 million dollarlik eksportni ko‘zlayapmiz”, — dedi tuman hokimi.
Eslatib o‘tamiz, prezident Shavkat Mirziyoyev joriy yil 19-fevral kuni Namangan viloyatiga tashrifi chog‘ida “Bunyodkor” mahallasida bo‘lgan va ichimlik suvi yo‘q, ichki yo‘llari yomon, atrofi obodonlashtirilmagan hududdagi ahvol uchun shahar hokimi va prokuroriga tanbeh bergandi.
Izoh (0)