Samarqanddagi oshxonada gaz balloni portlab, oqibatda 10 kishi jarohatlangani, holat yuzasidan jinoyat ishi qo‘zg‘atilgani haqida xabar berilgan edi. “Daryo” muxbiri voqea joyida bo‘lib, oshxonaning ayni paytdagi holati haqida fotoreportaj tayyorladi.
Favqulodda vaziyatlar vazirligi ma’lumotlariga ko‘ra, portlash 19-dekabr kuni soat 14:20 larda viloyatning Oqdaryo tumani “Navro‘z” mahallasida joylashgan “Lazzat” oshxonasida yuz bergan. Voqea joyida 2 ta propan gaz balloni bo‘lgan.
Hodisa oqibatida oshxonaning, taxminan, 40 kvadrat metr maydonidagi shift qismi va jihozlar yongan. Yong‘in-qutqaruv ekipaji soat 14:23 da hodisa joyiga yetib borib, 14:29 da yong‘in hududini qurshab olgan va soat 14:54 da holat bartaraf etilgan.
Birlamchi ma’lumotlarga ko‘ra, 10 kishi tan jarohati olib, tuman shifoxonasiga olib borilgan.
Portlash oqibatida oshxonaning eshik va deraza romlari deyarli butunlay singanini, shiftdagi plastik qoplamalar ko‘chib tushganini ko‘rish mumkin.
Oshxona ichkarisidagi buyumlar va oziq-ovqatlar yonib, yaroqsiz ahvolga kelgan.
Bosh prokuratura xabariga ko‘ra, holat yuzasidan Jinoyat kodeksining 259-moddasi (yong‘in xavfsizligi qoidalarini buzish) bilan jinoyat ishi qo‘zg‘atilgan.
Bundan avval Denovdagi savdo majmuasida yuz bergan kuchli portlash yuzasidan 3 kishi qamoqqa olingani haqida xabar berilgan edi. Portlash oqibatida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan.
Izoh (0)