Tanishining Gentra’sini olib qochgan shaxs daraxtga borib urildi, qoida buzgan Spark Lacetti bilan to‘qnashdi. YTHlar tafsiloti

O‘zbekiston yo‘llarida sodir bo‘lgan hodisalar tafsilotlarini taqdim etamiz.

Jizzaxda Nexia piyodani urib ketdi

Jizzax viloyati Sharof Rashidov tumani hududidan o‘tgan Jizzax–Gagarin 4R-38 yo‘lining 13-kilometrida yo‘l-transport hodisasi sodir bo‘ldi.

Qayd etilishicha, Zafarobod tumani Yorqin shaharchasida yashovchi shaxs boshqaruvidagi Nexia piyodani urib yuborgan. Jabrlanuvchi bosh miya yopiq jarohati bilan shifoxonaga yotqizilgan.

Holat yuzasidan tergovga qadar tekshiruv o‘tkazilmoqda.

Qoida buzgan Spark Lacetti bilan to‘qnashdi

2021-yil 18-dekabr kuni soat 07:20 larda Toshkent viloyati, Ohangaron tumani hududidan o‘tgan Olmaliq–Toshkent avtomobil yo‘lining 3-kilometrida haydovchi A.K. (1967-yilda tug‘ilgan) Spark avtomobilida ortga qayrilib olishda qoidalarni qo‘pol tarzda buzgan.

Oqibatda ushbu yo‘nalishda harakatlanib kelayotgan haydovchi R.A. (2002-yilda tug‘ilgan) boshqaruvidagi Lacetti rusumli avtomobil bilan to‘qnashuv sodir etgan.

YTH oqibatida tan jarohati olgan fuqarolar yo‘q.

Mazkur YTH yuzasidan Ohangaron tumani IIB YHXB xodimlari tomonidan surishtiruv olib borilmoqda.

Tanishining Gentra’sini olib qochgan shaxs YTH sodir etdi

2021-yil 14-dekabr kuni 43 yoshli R.R. tuman IIB boshlig‘i nomiga ariza bilan murojaat qilgan. Murojaatda 12-dekabr kuni soat 20:00 larda o‘ziga oldindan tanish bo‘lgan Buxoro viloyati G‘ijduvon tumanida yashovchi 31 yoshli A.Z. bilan birgalikda o‘ziga tegishli Gentra avtomashinasida Qiziltepa tumani “To‘dakul” dam olish maskaniga borishganini, u yerda ovqatlanishgani, spirtli ichimlik ichib, mast holda uxlab qolganidan foydalangan tanishi A.Z. unga tegishli bo‘lgan avtomashinasini dam olish maskanidan olib qochib ketganligini ma’lum qilgan. Fuqaro avtomashinasini topishni hamda A.Z.ga nisbatan qonuniy chora ko‘rishni so‘ragan.

Olib borilgan tergov-tezkor harakatlari natijasida R.R.ga tegishli Gentra Buxoro shahridagi “Buxoro trans Stand” MChJ jarima maydonchasida nosoz bo‘lgan holatda turganligi aniqlangan.

Mazkur holat yuzasidan Navoiy viloyati IIB huzuridagi Tergov boshqarmasi tomonidan A.Z.ga nisbatan Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilib, A.Z. protsessual tartibda ushlangan.

Dastlabki tergov jarayonida aniqlanishicha, A.Z. uyiga ketish uchun R.R.dan avtomashina kalitini so‘ramasdan olib, Vobkent tumani “Xar-xush” mahallasidan o‘tgan yo‘lda avtomashina boshqaruvini yo‘qotib, yo‘lning o‘ng tomonidagi daraxtga borib urilgani, so‘ngra qo‘rqib ketganidan yashiringanini ma’lum qilgan.

Hozirda tergov harakatlari olib borilmoqda.