Танишининг Gentra’сини олиб қочган шахс дарахтга бориб урилди, қоида бузган Spark Lacetti билан тўқнашди. ЙТҲлар тафсилоти

Ўзбекистон йўлларида содир бўлган ҳодисалар тафсилотларини тақдим этамиз.

Жиззахда Nexia пиёдани уриб кетди

Жиззах вилояти Шароф Рашидов тумани ҳудудидан ўтган Жиззах–Гагарин 4Р-38 йўлининг 13-километрида йўл-транспорт ҳодисаси содир бўлди.

Қайд этилишича, Зафаробод тумани Ёрқин шаҳарчасида яшовчи шахс бошқарувидаги Nexia пиёдани уриб юборган. Жабрланувчи бош мия ёпиқ жароҳати билан шифохонага ётқизилган.

Ҳолат юзасидан терговга қадар текширув ўтказилмоқда.

Қоида бузган Spark Lacetti билан тўқнашди

2021 йил 18 декабрь куни соат 07:20 ларда Тошкент вилояти, Оҳангарон тумани ҳудудидан ўтган Олмалиқ–Тошкент автомобиль йўлининг 3-километрида ҳайдовчи А.К. (1967 йилда туғилган) Spark автомобилида ортга қайрилиб олишда қоидаларни қўпол тарзда бузган.

Оқибатда ушбу йўналишда ҳаракатланиб келаётган ҳайдовчи Р.А. (2002 йилда туғилган) бошқарувидаги Lacetti русумли автомобиль билан тўқнашув содир этган.

ЙТҲ оқибатида тан жароҳати олган фуқаролар йўқ.

Мазкур ЙТҲ юзасидан Оҳангарон тумани ИИБ ЙҲХБ ходимлари томонидан суриштирув олиб борилмоқда.

Танишининг Gentra’сини олиб қочган шахс ЙТҲ содир этди

2021 йил 14 декабрь куни 43 ёшли Р.Р. туман ИИБ бошлиғи номига ариза билан мурожаат қилган. Мурожаатда 12 декабрь куни соат 20:00 ларда ўзига олдиндан таниш бўлган Бухоро вилояти Ғиждувон туманида яшовчи 31 ёшли А.З. билан биргаликда ўзига тегишли Gentra автомашинасида Қизилтепа тумани «Тўдакул» дам олиш масканига боришганини, у ерда овқатланишгани, спиртли ичимлик ичиб, маст ҳолда ухлаб қолганидан фойдаланган таниши А.З. унга тегишли бўлган автомашинасини дам олиш масканидан олиб қочиб кетганлигини маълум қилган. Фуқаро автомашинасини топишни ҳамда А.З.га нисбатан қонуний чора кўришни сўраган.

Олиб борилган тергов-тезкор ҳаракатлари натижасида Р.Р.га тегишли Gentra Бухоро шаҳридаги «Бухоро транс Станд» МЧЖ жарима майдончасида носоз бўлган ҳолатда турганлиги аниқланган.

Мазкур ҳолат юзасидан Навоий вилояти ИИБ ҳузуридаги Тергов бошқармаси томонидан А.З.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилиб, А.З. процессуал тартибда ушланган.

Дастлабки тергов жараёнида аниқланишича, А.З. уйига кетиш учун Р.Р.дан автомашина калитини сўрамасдан олиб, Вобкент тумани «Хар-хуш» маҳалласидан ўтган йўлда автомашина бошқарувини йўқотиб, йўлнинг ўнг томонидаги дарахтга бориб урилгани, сўнгра қўрқиб кетганидан яширинганини маълум қилган.

Ҳозирда тергов ҳаракатлари олиб борилмоқда.