2022-yil Samarqand viloyatida infratuzilmani yaxshilash uchun 274,4 milliard so‘m ajratiladi. Bu haqda Samarqand viloyati hokimi Erkinjon Turdimov xalq deputatlari Samarqand viloyat kengashining 50-sessiyasidagi murojaatida ma’lum qildi, deya xabar bermoqda “Daryo” muxbiri.
Xususan, 59,9 milliard so‘mga 86 kilometr avtomobil yo‘llari, 148 kilometr yangi elektr tarmoqlari tortish uchun 49,7 milliard so‘m, 24,6 kilometr tabiiy gaz tarmoqlari tortish uchun 8,4 milliard so‘m, 284 kilometr suv va oqova suv tarmoqlari tortish uchun 157,3 milliard so‘m ajratiladi.
Erkinjon Turdimovning aytishicha, Samarqand shahridagi Amir Temur ko‘chasini ta’mirlash shundoq ham tirbandlik ko‘pligi sabab kechiktirilgan.
“Keyingi yil Amir Temur hamda Gagarin ko‘chasi Abu-Dabi fondi mablag‘lari hisobidan devordan devorgacha usulida ta’mirlanadi. Gagarin ko‘chasi esa davom ettirilib, Motriddagi yangi Qorasuv massivigacha olib boriladi. Natijada yangi shaharchaga aylangan Qorasuvga borishdagi tirbandlik bartaraf etilishi ko‘zlanmoqda. Shuningdek, kelasi yil Samarqandda yana ikkita tunnel va ikkita yo‘l o‘tkazgich ko‘prik quriladi”, — deydi viloyat hokimi.
Murojaatda ma’lum qilinishicha, bugungi kunda viloyatdagi OTMlarda 63 mingdan ortiq talaba o‘qimoqda. Bu o‘tgan 5 yillikka qaraganda 5 baravar ko‘p. Viloyat hokimi ayni damda Samarqandda boshqa viloyatlar va uzoq tumanlardan qatnab o‘qiydiganlar ko‘pligi uchun 17,1 ming o‘rinli talabalar turar joylariga ehtiyoj mavjudligini ta’kidlagan. Shu sababli xalq tilida “Makaronka” deb ataladigan “Birlik” mahallasi hamda Ro‘dakiy ko‘chasidagi sobiq g‘isht zavodi o‘rnida talabalar turar joyi quriladi.
“2022-yilgi ijtimoiy loyihalar asosida viloyatdagi onkologiya, kardiologiya kasalxonalarida jiddiy o‘zgarishlar bo‘ladi. 2 million yevroga onkologiya markazi uchun ichki va tashqi nur terapiya apparatlari o‘rnatiladi. Kardiologiya markaziga esa 30 milliard so‘mga 48 turdagi zamonaviy uskunalar olib kelinadi. Urgut va Paxtachida kardiologiya markazi tashkil etiladi”, — deydi Erkinjon Turdimov.
Avvalroq Samarqand viloyatida 3 nafar hokim va 20 nafar hokim o‘rinbosariga ogohlantirish hamda hayfsan berilgani, Samarqandda “Minsk” xiyobonidagi qurilish bo‘yicha jinoyat ishi qo‘zg‘atilgani to‘g‘risida xabar berilgandi.
Mavzuga doir:
- “Maktabni yomon qilgan siz bilan bizmiz”. Erkinjon Turdimov Samarqanddagi maktablarning shakliga hokim va sektor rahbarlari javob berishini ma’lum qildi
- “Tibbiyot sohasini keng jamoatchilik nazoratisiz o‘zgartirib bo‘lmaydi” — Turdimov samarqandliklardan sohadagi kamchiliklar bo‘yicha murojaat yo‘llashni so‘radi
Izoh (0)