Davlat xavfsizlik xizmati Samarqand viloyati boshqarmasi, prokuratura va ichki ishlar boshqarmalari xodimlari bilan o‘tkazilgan tezkor tadbirda 34 ming dollarga yer sotmoqchi bo‘lgan fuqaro qo‘lga olingan. Bu haqida “Daryo”ga DXX Samarqand viloyati boshqarmasi ma’lum qildi.
Ta’kidlanishicha, Bulung‘ur tumanida yashovchi fuqaro Sh.B. sotish huquqiga ega bo‘lmay turib, o‘ziga tegishli 50 sotix yer maydonini 34 ming dollarga mahalliy fuqaroga sotishga kelishib, undan 10 ming dollarini olgan vaqtda ashyoviy dalillar bilan ushlangan.
Shuningdek, Davlat soliq qo‘mitasi huzuridagi Davlat kadastrlar palatasi Bulung‘ur tumani filialining yuqori lavozimida ishlovchi xodimi ushbu yer maydonini tegishli kadastr hujjatlarini tayyorlab berish evaziga 3 ming dollar talab qilgani aniqlangan.
Olingan ko‘rsatmalar asosida tadbir davom ettirilib, Davlat kadastrlar palatasi Bulung‘ur tumani filiali xodimi 3 ming dollarni o‘z xizmat avtomashinasida olgan vaqtda tezkor xodimlar tomonidan ashyoviy dalillar bilan qo‘lga olingan.
Hozirda mazkur holat bo‘yicha Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Olmazor tumani hokimligi mansabdori 12 gektar yerni 1,5 mln dollar evaziga olib bermoqchi bo‘lganida ushlangani, Chinozda 1,8 gektar yerni 25 ming dollarga noqonuniy sotmoqchi bo‘lgan ayol qo‘lga olingani, Toshkent viloyatida o‘zgaga ajratilgan 20 sotix yerni 110 ming dollarga sotishga uringan shaxs ushlangani to‘g‘risida xabar berilgandi.
Izoh (0)