2021-yildan boshlab samarqandlik tadbirkorlar o‘z mahsulotlarini Yamayka, Kolumbiya, Qatar, Makedoniya, Bangladesh va Livanga eksport qilish evaziga viloyatda ishlab chiqarilgan mahsulotlarining eksport geografiyasi 56 ta davlatga kengaygan. Bu haqda viloyat hokimi Erkinjon Turdimov xalq deputatlari Samarqand viloyat kengashining 50-sessiyasidagi murojaatida ma’lum qildi, deya xabar bermoqda “Daryo” muxbiri.
Viloyat hokimining ma’lum qilishicha, 2021-yil samarqandlik tadbirkorlar 402 million dollarlik mahsulot eksport qilgan — bu reja 16 foizga oshirib (55 million dollarga) bajarildi degani. Eksport hajmi bir yil oldingiga qaraganda 60 foizga oshgan.
Ta’kidlanishicha, Samarqanddan 2021-yil 144 million dollarlik tekstil, 125 million dollarlik oziq-ovqat, 30 million dollarlik ozuqa-yem hamda 23 million dollarlik metall va undan tayyorlangan mahsulotlar eksporti amalga oshirilgan.
2021-yilda 25 million dollarlik mayiz, 11,6 million dollarlik mosh, 9 million dollarlik uzum, 5,5 million dollarlik yeryong‘oq kabi mahsulotlar eksport qilingan. Shuningdek, 700 ming dollarlik 7 turdagi yangi salat bargi, yangi navli gilos, yangi uzilgan selderey ko‘katlari va yangi navli bodring Mongoliya, Iroq, Qozog‘iston va Rossiya davlatlariga eksport qilingan.
Avvalroq O‘zbekiston 2021-yilning yanvar–oktabr oylarida 46 ta xorijiy davlatga qiymati 153,2 million AQSh dollariga teng bo‘lgan qariyb 204 ming tonna uzum eksport qilgani to‘g‘risida xabar berilgandi.
Mavzuga doir:
Izoh (0)