Oliy Majlis senatori Tolibjon Madumarov Toshkentdagi “Qo‘yliq” bozori ko‘chirilishi haqida hali hokim qarori yo‘qligini ma’lum qildi. Bu haqda 17-dekabr kuni AOKA majlislar zalida Oliy Majlis Senatining yigirma ikkinchi yalpi majlisi yakunlariga bag‘ishlangan matbuot anjumanida aytib o‘tildi.
Jurnalistning “Qo‘yliq” bozori haqida bergan savoliga senator Tolibjon Madumarov javob berdi.
“Biz ushbu masala ijtimoiy tarmoqda keng jamoatchilik tomonidan muhokama qilingach, joyiga chiqib o‘rganish ishlarini olib bordik. ‘Qo‘yliq’ni ko‘chirish bo‘yicha shahar hokimining qarori chiqmagan, hozirda bozorning ko‘chirilishi haqida hech qanday gap-so‘z yo‘q”, – deydi Madumarov.
Eslatib o‘tamiz, 7-dekabr kuni Qo‘yliqda yo‘l infratuzilmasini yaxshilash, kommunikatsiya tarmoqlarini takomillashtirish va tirbandliklarning oldini olish maqsadida ushbu hududda yo‘l kengayishi va ko‘prik qurilishi ishlari rejalashtirilgani va shu sababli Toshkentdagi eng yirik bozorlardan biri boshqa manzilga ko‘chirilishi xabar qilingandi.
9-dekabr kuni esa “bozor buzilishidan norozi odamlar” katta avtoyo‘lni to‘sib qo‘ygani aks etgan videolavha tarqaldi. “Daryo” vaziyat yuzasidan izoh olish maqsadida Toshkent shahar hokimligi, Ichki ishlar vazirligi hamda Toshkent shahar IIBB matbuot xizmatlariga murojaat qildi. Hokimlik matbuot xizmati so‘rovlarga javob bermagan bo‘lsa, huquq-tartibot organlari vakillari “vaziyat bo‘yicha ish olib borilayotgani”ni, yaqin vaqt ichida rasmiy izoh berilishini ma’lum qildi.
Keyinroq “Qo‘yliq” bozori Qo‘yliqdan 6,5 kilometr uzoqlikda, Toshkent viloyatida joylashgan Food City savdo majmuasiga ko‘chirilishi haqida xabarlar tarqaldi. Qayd etilishicha, bozorini ko‘chirish to‘g‘risidagi qaror 2017-yilda qabul qilingan.
“Qo‘yliq” dehqon bozori direktorining xavfsizlik bo‘yicha o‘rinbosari Qodirjon Normirzayevning bergan ma’lumotiga ko‘ra esa, bozor buzilishi yoki ko‘chishi haqida shahar hokimiyati tomonidan xat yoki og‘zaki topshiriq berilmagan.
Bektemir tumani hokimi Tapil Mahamadziyayev esa “Qo‘yliq” bozori ko‘chirilishiga oid xabarlarga aniqlik kiritib, “O‘zim ham Qo‘yliqdan bozor qilaman, lekin uni ko‘chirmasak bo‘lmaydi”, degandi.
Izoh (0)