Қибрайдаги яна 8 та маҳалла, 3 та мактаб ва 5 мингдан ортиқ турар жойлар Тошкент шаҳри ҳудудига ўтказилди

Давлат кадастрлари палатасининг Тошкент вилояти бошқармаси Қибрай туманидан Тошкент шаҳрининг Яшнобод туманига ўтган ижтимоий объектлар тўғрисида маълумот берди.

Маълум қилинишича, Олий Мажлис Қонунчилик палатасининг Тошкент вилояти ва Тошкент шаҳри чегараларининг ўзгариши юзасидан тегишли қарори ижроси юзасидан ҳудудларда бир қатор ишлар амалга оширилган.

Хусусан, Кадастр агентлиги ва Давлат кадастрлари палатасининг Тошкент вилояти бошқармалари томонидан ҳудудларда олиб борилган хатлов ишлари натижаларига кўра, Қибрай туманидан Яшнобод туманига жами 2107,4 гектар ер, шундан 1002,6 гектар қишлоқ хўжалиги ер майдони ҳамда қуйидаги ижтимоий объектлар ўтказилиши таъминланган:

• маҳаллалар — 8 та;
• нотурар жойлар — 195 та;
• турар жойлар — 5091 та;
• мактаблар — 3 та;
• мактабгача таълим муассасалари — 1 та;
• диний муассасалар — 2 та;
• қабристонлар — 2 та;
• тиббий муассасалар — 1 та.

Қибрай туманидан Яшнобод туманига ўтаётган аҳолининг доимий яшаш манзили Тошкент шаҳри Яшнобод тумани этиб белгиланган.

Аввалроқ Зангиота туманидан Тошкент шаҳрининг Сергели туманига ўтказилган ижтимоий объектлар, Қибрайдаги 13 та маҳалла Тошкент шаҳри ҳудудига ўтказилгани тўғрисида хабар берилганди.

Эслатиб ўтамиз, 2020 йилнинг 5 август куни Шавкат Мирзиёев Тошкент шаҳри ва Тошкент вилоятининг ўзаро чегарадош бўлган туманлари ҳудудларини ўзгартириш бўйича тайёрланган лойиҳалар тақдимоти билан танишганди. Ўшанда аҳолига қулайлик яратиш мақсадида шаҳардан Тошкент вилоятига 1010 гектар, вилоятдан пойтахтга 10 196 гектар ер майдони ўтказилиши режалаштирилган эди. Кейинроқ Улуғбек шаҳарчасининг аҳолиси Тошкент вилояти таркибига, шунингдек, Учтепа тумани яшовчилари учта маҳалла Тошкент вилоятининг Зангиота тумани таркибига ўтказишга қарши чиққанди.

2021 йил июль охирларида Халқ депутатлари Тошкент шаҳар кенгаши қарори билан пойтахтнинг Сергели, Бектемир ва Мирзо Улуғбек туманлари ҳудуди Тошкент вилоятининг Зангиота, Қибрай, Юқори Чирчиқ ва Ўрта Чирчиқ туманлари ҳисобига 7,8 минг гектардан кўпроққа кенгайтирилгани маълум бўлди.