O‘zbekistonda valyutani noqonuniy sotib olish va sotganlik uchun jazo yumshatildi

O‘zbekistonda valyuta boyliklarini noqonuniy olish yoki o‘tkazganlik uchun jazo choralari yumshatildi. Bu haqda Ma’muriy javobgarlik to‘g‘risidagi kodeksga tegishli o‘zgartish kiritish bo‘yicha qonun 30-nobyar kuni prezident Shavkat Mirziyoyev tomonidan imzolandi, deb xabar beradi “Gazeta.uz”.

Ma’lum qilinishicha, Ma’muriy javobgarlik to‘g‘risidagi kodeks 170-moddasining yangi tahririga ko‘ra, valyuta boyliklarini qonunga xilof ravishda olish yoki o‘tkazish valyuta boyliklari musodara qilingan holda 15 sutkagacha (oldin to‘liq 15 sutka) ma’muriy qamoq jazosiga sabab bo‘lishi mumkin.

Ma’muriy qamoq qo‘llanilishi mumkin bo‘lmagan shaxslarga bazaviy hisoblash miqdorining 10 baravaridan 20 baravarigacha (oldin 20 BHM) jarima qo‘llaniladi.

O‘zgarishlar 1-dekabrdan boshlab amal qiladi. Qonun Qonunchilik palatasi tomonidan 18-oktabrda qabul qilingan, Senat tomonidan 19-noyabrda ma’qullangan.

Avvalroq Oliy Majlis Qonunchilik palatasi deputati Rasul Kusherbayev dam olish kunlari dollarni “qora bozor”da almashtirishga majbur bo‘lganini yozib, Markaziy bankni tanqid qilgandi. “Men o‘zim xohlamagan holda ‘qora bozor’ni qidirib, 50 dollarni qaytim bilan olishim uchun jinoyatga yo‘l qo‘yib, noqonuniy valyuta ayirboshlashim kerak… Hozir menga guvoh bo‘lib turasizlar deb, bankning vakillarini chaqirdim”, — deb yozgandi deputat.

Eslatib o‘tamiz, O‘zbekistonda 2019-yil avgust oyida ko‘p yillardan beri birinchi marta chet el valyutasini naqd ko‘rinishda sotib olishga ruxsat berildi. Bunga qadar odamlar dollarni faqat xalqaro bank plastik kartalari orqali (Visa, MasterCard va boshqalar) sotib olishlari mumkin edi.