Ўзбекистонда тадбиркорларга валюта айирбошлаш хизматларини кўрсатишга рухсат бериш режалаштирилмоқда. Бу ҳақда президентнинг «Рақобат муҳитига салбий таъсир кўрсатадиган тўсиқларни бартараф этиш ва тадбиркорлик фаолияти йўналишларини янада кенгайтириш чора-тадбирлари тўғрисида»ги қарори лойиҳасида кўзда тутилган.
Ҳужжатга кўра, 2022 йилда хорижий давлатлар тажрибасидан келиб чиқиб, норасмий валюта операциялари вужудга келишининг олдини олиш, шунингдек, хизматларни узлуксиз равишда (24/7 режимда) кўрсатиш имконини яратиш мақсадида хусусий тадбиркорларга валюта айирбошлаш хизматларини кўрсатишга рухсат бериш режалаштирилмоқда.
Шунингдек, молиявий хизматлар кўрсатиш билан шуғулланувчи тадбиркорлик субъектларига кредит уюшмаси хизматлар бозорига кириш имкониятларини яратиш кўзда тутилган.
Лойиҳа иқтисодиётнинг монополлашуви юқори бўлган айрим соҳаларда рақобат муҳитини ривожлантириш, хусусий секторга бериладиган, шу жумладан, давлат хусусий-шериклик асосида жалб қилинадиган фаолият турлари учун тенг рақобат шартларини, шунингдек, товар ва молия бозорларнинг самарали фаолият кўрсатиши учун кенг имкониятларни яратиш мақсадида ишлаб чиқилган.
Ушбу ҳужжат лойиҳаси муҳокамаси 31 декабрга қадар давом этади.
Эслатиб ўтамиз, Олий Мажлис Қонунчилик палатаси депутати Расул Кушербаев Facebook’да жонли эфирга чиқиб, ўзи истиқомат қиладиган Янгийўл шаҳрида 27 ноябрь, шанба куни бир соат давомида валюта айирбошлаш шохобчасини излагани, бироқ уларнинг барчаси ёпиқлиги сабаб 50 долларни «қора бозорда» алмаштиришга мажбур бўлганини ёзиб, Марказий банкни танқид қилганди. Ҳолатга Адлия вазирлиги муносабат билдириб, унинг бу ҳаракатини қоралаганди. Вазирлик Қонунчилик палатаси депутати сифатида Расул Кушербаев ўз ваколатлари доирасида масалани тизимли ҳал қилиш мақсадида тегишли сўров билан мутасадди идораларга мурожаат этиши, валюта соҳасидаги қонунларга ўзгартириш бўйича ташаббус билан чиқиши ҳам мумкин бўлганини таъкидлаб ўтган.
Изоҳ (0)