Qoraqalpog‘istonning Qo‘ng‘irot tumanida mahkumni ozodlikka chiqarib bermoqchi bo‘lgan shaxs ushlandi, deb xabar bermoqda Iqtisodiy jinoyatlarga qarshi kurashish departamenti.
Ma’lum qilinishicha, Bosh prokuratura huzuridagi departament, Davlat xavfsizlik xizmati va tuman ichki ishlar bo‘limi tomonidan tezkor tadbir o‘tkazilgan. Unda tuman tibbiyot birlashmasi hamshirasi Sh.A. manzil koloniyasida jazo muddatini o‘tayotgan mahkum F.ning ishonchiga kirib, uni yuqori lavozimdagi tanishlari orqali ozodlikka chiqarib berishini aytib, evaziga 10 ming dollar talab qilgani aniqlangan.
Qayd etilishicha, u kelishilgan pulning 5 ming dollarini olgan vaqtida ashyoviy dalillar bilan ushlangan.
Ta’kidlanishicha, holat yuzasidan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Surxondaryoda 19 yilga qamalgan mahbusni 70 ming dollar evaziga qamoqdan chiqarib bermoqchi bo‘lgan shaxs ushlangani xabar qilingandi. Shuningdek, Jizzaxda mahkum o‘zini Prezident Administratsiyasi xodimi deb tanishtirib, jinoyat sodir etgani, Navoiydagi qamoqxonada “Hizb ut-Tahrir” tarafdori mahkumlarga terroristik g‘oyalarni targ‘ib qilgani ma’lum qilingan.
Izoh (0)