Фарғонада 16 ёшли бола акасининг қарзи учун ўзганинг «Волга»сини ўғирлади

Фарғона вилояти Қўқон шаҳрида 8 декабрь куни вояга етмаган бола ўзганинг «Газ-3102» машинасини ўғирлади, деб хабар бермоқда Тергов департаменти.

Маълум қилинишича, шу куни соат 20:35 атрофида Қўқон шаҳрида яшовчи 60 ёшли Р.М. Фарғона вилоят Ички ишлар бошқармасига мурожаат қилиб, Шарқ мавзеси 9-сонли кўп қаватли уй ёнида жойлашган автотураргоҳдан ўзининг «Газ-3102» машинаси номаълум шахслар томонидан олиб қочиб кетилганини маълум қилган.

Олиб борилган қидирув ишлари натижасида жиноятни вояга етмаган 16 ёшли Т.О. қилгани аниқланган. У машина эшикларини калит танлаш йўли билан очиб, қулфни бузиб, электр кабелларни улаш йўли билан ўт олдирган ва олиб қочиб кетган. У транспорт воситасини Бувайда тумани Янгиқўрғон қишлоғида яшовчи П.Э.га акасининг қарзи эвазига гаровга бериб юборган.

Қайд этилишича, машина П.Э.дан холислар иштирокида ашёвий далил сифатида олинган.

Таъкидланишича, ҳолат юзасидан Т.О.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган. Ҳозирда тергов ҳаракатлари давом этмоқда.

Мазкур модда билан айбдор деб топилган шахс беш йилдан ўн йилгача озодликдан маҳрум қилиш билан жазоланади.