Normativ-huquqiy hujjatlar muhokamasi portalida Oliy Majlis palatalarining “O‘zbekiston Respublikasi davlat xizmatchilarining odob-axloq kodeksini tasdiqlash to‘g‘risida”gi qarori muhokamaga qo‘yildi.
Qayd etilishicha, kodeksning maqsadi davlat xizmatchilarining kasbiy faoliyati davomidagi odob-axloq normalarini belgilash, huquqbuzarlikning oldini olish hisoblanadi. Kodeks barcha davlat xizmatchilariga qo‘llaniladi. Odob-axloq kodeksi loyihasi 6 ta bob va 53 ta moddadan iborat. Unda davlat xizmatchilarining o‘zi, turmush o‘rtog‘i va voyaga yetmagan farzandlarining daromadlari va mol-mulkini deklaratsiya qilish, manfaatlar to‘qnashuvi to‘g‘risida xabar berish majburiyatlari belgilanmoqda. Shuningdek, loyiha ish jarayonidagi mehmondo‘stlik belgilari, sovg‘alar, mahalliychilik, xodimni ta’qib qilish, tanish-bilishchilik, favoritizm kabi tushunchalarni ham qamrab olgan.
Qonun loyihasiga ko‘ra, davlat xizmatchisi quyidagi odob-axloq majburiyatlariga ega:
- Konstitutsiya, boshqa normativ hujjatlar, tashkilotning ichki hujjatlariga amal qilish;
- xizmat vazifasini bajarish paytida fuqarolar va boshqalarni kamsitmaslik;
- turli etnik guruhlar, millatlararo totuvlikka ko‘maklashgan holda urf-odat va an’analarni hurmat qilish;
- guruhbozlik, mahalliychilik, tanish-bilishchilikni oldini olishda ishtirok etish;
- ommaviy axborot vositalari vakillarining faoliyatiga hurmat bilan munosabatda bo‘lish;
- xizmat xonalari, davlat mulki, moddiy-texnik bazadan faqat xizmat maqsadida foydalanish;
- o‘zi, turmush o‘rtog‘i va voyaga yetmagan farzandlarining daromad va mol-mulki to‘g‘risida deklaratsiya to‘ldirish.
- ta’qib qilishga yo‘l qo‘ymaslik va xodimlarga haq to‘lash. rag‘batlantirish va xizmat bo‘yicha ko‘tarilishda teng huquq va imkoniyat berish;
- o‘ziga bo‘ysunuvchi xodimlar bilan uzoq muddatli hamkorlik qilish, ijtimoiy sheriklikni o‘rnatish;
- korrupsiyaning oldini olish, unga qarshi kurashgan xxodimlarni rag‘batlantirish;
- xodimlarga lavozim majburiyatlari doirasidan chetga chiqadigan vazifa bermaslik.
Shuningdek, qonun bilan davlat xizmatchilarining internet, xususan, ijtimoiy tarmoqlardagi chiqishlari ham tartibga solinmoqda:
“Davlat xizmatchilari internet butunjahon axborot tarmog‘i va ijtimoiy tarmoqlardan shaxsiy maqsadlarda foydalanish huquqiga ega. Biroq davlat tashkilotlarining nufuziga yoki boshqa shaxslarning sha’ni va qadr-qimmatiga zarar yetkazuvchi ma’lumotlarni tarqatmasligi kerak”.
Loyiha muhokamasi 24-dekabrga qadar davom etadi.
Avvalroq Qonunchilik palatasiga “Davlat fuqarolik xizmati to‘g‘risida”gi qonun loyihasi kiritilgani xabar qilingandi. Unga ko‘ra, O‘zbekistonda davlat xizmatchilarining har qanday turdagi mukofot va sovg‘a olishi taqiqlanadi.
Izoh (0)