Норматив-ҳуқуқий ҳужжатлар муҳокамаси порталида Олий Мажлис палаталарининг «Ўзбекистон Республикаси давлат хизматчиларининг одоб-ахлоқ кодексини тасдиқлаш тўғрисида»ги қарори муҳокамага қўйилди.
Қайд этилишича, кодекснинг мақсади давлат хизматчиларининг касбий фаолияти давомидаги одоб-ахлоқ нормаларини белгилаш, ҳуқуқбузарликнинг олдини олиш ҳисобланади. Кодекс барча давлат хизматчиларига қўлланилади. Одоб-ахлоқ кодекси лойиҳаси 6 та боб ва 53 та моддадан иборат. Унда давлат хизматчиларининг ўзи, турмуш ўртоғи ва вояга етмаган фарзандларининг даромадлари ва мол-мулкини декларация қилиш, манфаатлар тўқнашуви тўғрисида хабар бериш мажбуриятлари белгиланмоқда. Шунингдек, лойиҳа иш жараёнидаги меҳмондўстлик белгилари, совғалар, маҳаллийчилик, ходимни таъқиб қилиш, таниш-билишчилик, фаворитизм каби тушунчаларни ҳам қамраб олган.
Қонун лойиҳасига кўра, давлат хизматчиси қуйидаги одоб-ахлоқ мажбуриятларига эга:
- Конституция, бошқа норматив ҳужжатлар, ташкилотнинг ички ҳужжатларига амал қилиш;
- хизмат вазифасини бажариш пайтида фуқаролар ва бошқаларни камситмаслик;
- турли этник гуруҳлар, миллатлараро тотувликка кўмаклашган ҳолда урф-одат ва анъаналарни ҳурмат қилиш;
- гуруҳбозлик, маҳаллийчилик, таниш-билишчиликни олдини олишда иштирок этиш;
- оммавий ахборот воситалари вакилларининг фаолиятига ҳурмат билан муносабатда бўлиш;
- хизмат хоналари, давлат мулки, моддий-техник базадан фақат хизмат мақсадида фойдаланиш;
- ўзи, турмуш ўртоғи ва вояга етмаган фарзандларининг даромад ва мол-мулки тўғрисида декларация тўлдириш.
- таъқиб қилишга йўл қўймаслик ва ходимларга ҳақ тўлаш. рағбатлантириш ва хизмат бўйича кўтарилишда тенг ҳуқуқ ва имконият бериш;
- ўзига бўйсунувчи ходимлар билан узоқ муддатли ҳамкорлик қилиш, ижтимоий шерикликни ўрнатиш;
- коррупциянинг олдини олиш, унга қарши курашган хходимларни рағбатлантириш;
- ходимларга лавозим мажбуриятлари доирасидан четга чиқадиган вазифа бермаслик.
Шунингдек, қонун билан давлат хизматчиларининг интернет, хусусан, ижтимоий тармоқлардаги чиқишлари ҳам тартибга солинмоқда:
«Давлат хизматчилари интернет бутунжаҳон ахборот тармоғи ва ижтимоий тармоқлардан шахсий мақсадларда фойдаланиш ҳуқуқига эга. Бироқ давлат ташкилотларининг нуфузига ёки бошқа шахсларнинг шаъни ва қадр-қимматига зарар етказувчи маълумотларни тарқатмаслиги керак».
Лойиҳа муҳокамаси 24 декабрга қадар давом этади.
Аввалроқ Қонунчилик палатасига «Давлат фуқаролик хизмати тўғрисида»ги қонун лойиҳаси киритилгани хабар қилинганди. Унга кўра, Ўзбекистонда давлат хизматчиларининг ҳар қандай турдаги мукофот ва совға олиши тақиқланади.
Изоҳ (0)