Shavkat Mirziyoyev Qozog‘iston poytaxti Nur-Sulton shahriga tashrifini yakunlab, Toshkent shahriga qaytib keldi. Bu haqda Prezident matbuot xizmati xabar qildi.
Ma’lum qilinishicha, amaliy tashrif chog‘ida ikki tomonlama hamkorlikning turli sohalariga doir 22 ta hujjat imzolangan. “O‘zbekiston va Qozog‘iston munosabatlari ittifoqchilik darajasiga ko‘tarilgani tarixiy voqea bo‘ldi”, — deyiladi xabarda.
Eslatib o‘tamiz, Shavkat Mirziyoyev 5-dekabr kuni Qosim-Jo‘mart To‘qayevning taklifiga binoan Qozog‘istonga jo‘nab ketgandi. Uni Nur-Sulton aeroportida Qozog‘iston prezidenti kutib oldi.
Tashrif chog‘ida Oqo‘rdada Shavkat Mirziyoyev va Qosim-Jo‘mart To‘qayev tor doirada muzokaralar o‘tkazdi va ikki tomonlama hamkorlikning muhim vazifalarini belgilab oldi. Shavkat Mirziyoyev Nur-Sultondagi “Vatan himoyachilari” monumentiga gul qo‘ydi, Qozog‘istondagi O‘zbekiston elchixonasining yangi binosi ochilishida qatnashdi va Nur-Sultondagi Raqamli hukumat ofisiga tashrif buyurdi. Bundan tashqari, Shavkat Mirziyoyev Qozog‘iston birinchi prezidenti Nursulton Nazarboyev bilan uchrashdi, O‘zbekiston va Qozog‘iston o‘rtasida ittifoqchilik munosabatlari to‘g‘risidagi deklaratsiya imzolandi.
Izoh (0)