Шавкат Мирзиёев Қозоғистон пойтахти Нур-Султон шаҳрига ташрифини якунлаб, Тошкент шаҳрига қайтиб келди. Бу ҳақда Президент матбуот хизмати хабар қилди.
Маълум қилинишича, амалий ташриф чоғида икки томонлама ҳамкорликнинг турли соҳаларига доир 22 та ҳужжат имзоланган. «Ўзбекистон ва Қозоғистон муносабатлари иттифоқчилик даражасига кўтарилгани тарихий воқеа бўлди», — дейилади хабарда.
Эслатиб ўтамиз, Шавкат Мирзиёев 5 декабрь куни Қосим-Жўмарт Тўқаевнинг таклифига биноан Қозоғистонга жўнаб кетганди. Уни Нур-Султон аэропортида Қозоғистон президенти кутиб олди.
Ташриф чоғида Оқўрдада Шавкат Мирзиёев ва Қосим-Жўмарт Тўқаев тор доирада музокаралар ўтказди ва икки томонлама ҳамкорликнинг муҳим вазифаларини белгилаб олди. Шавкат Мирзиёев Нур-Султондаги «Ватан ҳимоячилари» монументига гул қўйди, Қозоғистондаги Ўзбекистон элчихонасининг янги биноси очилишида қатнашди ва Нур-Султондаги Рақамли ҳукумат офисига ташриф буюрди. Бундан ташқари, Шавкат Мирзиёев Қозоғистон биринчи президенти Нурсултон Назарбоев билан учрашди, Ўзбекистон ва Қозоғистон ўртасида иттифоқчилик муносабатлари тўғрисидаги декларация имзоланди.
Изоҳ (0)