O‘zbekiston prezidenti Shavkat Mirziyoyev 6-dekabr kuni Qirg‘iziston prezidenti Sadir Japarov bilan telefon orqali muloqot qildi, deb xabar beradi davlat rahbarining matbuot xizmati.
Ma’lum qilinishicha, Shavkat Mirziyoyev Qirg‘iziston prezidentini tavallud kuni bilan samimiy tabriklab, unga mustahkam sog‘lik, farovonlik va katta muvaffaqiyatlar, birodar qirg‘iz xalqiga esa tinchlik-osoyishtalik va ravnaq tilagan.
Yetakchilar O‘zbekiston va Qirg‘iziston o‘rtasidagi ko‘p asrlik do‘stlik va yaxshi qo‘shnichilik rishtalariga asoslangan strategik sheriklik munosabatlari izchil mustahkamlanib borayotganini mamnuniyat bilan ta’kidlagan.
“Turli darajalardagi konstruktiv muloqot va faol almashinuvlarni davom ettirish, tovar ayirboshlash hajmini oshirish, mashinasozlik, energetika va elektrotexnika tarmoqlari, qishloq xo‘jaligi, farmatsevtika va boshqa sohalarda muhim kooperatsiya loyihalarini birgalikda ilgari surish muhimligi qayd etildi. Biznes va hududlar darajasida amaliy hamkorlikni kengaytirish, madaniy-gumanitar dasturlarni amalga oshirishga alohida e’tibor qaratildi”, — deyiladi xabarda.
Shuningdek, xalqaro va mintaqa kun tartibi yuzasidan ham fikr almashilgan. Telefon orqali muloqot har doimgidek iliq, samimiy va do‘stona ruhda o‘tgan.
Eslatib o‘tamiz, Sadir Japarov 2021-yilning yanvarida Qirg‘iziston prezidenti saylovida salkam 80 foiz ovoz olib g‘alaba qozongandi. Mart oyida esa Qirg‘iziston prezidenti Sadir Japarov davlat tashrifi bilan Toshkentga kelgan.
Izoh (0)