Ўзбекистон президенти Шавкат Мирзиёев 6 декабрь куни Қирғизистон президенти Садир Жапаров билан телефон орқали мулоқот қилди, деб хабар беради давлат раҳбарининг матбуот хизмати.
Маълум қилинишича, Шавкат Мирзиёев Қирғизистон президентини таваллуд куни билан самимий табриклаб, унга мустаҳкам соғлик, фаровонлик ва катта муваффақиятлар, биродар қирғиз халқига эса тинчлик-осойишталик ва равнақ тилаган.
Етакчилар Ўзбекистон ва Қирғизистон ўртасидаги кўп асрлик дўстлик ва яхши қўшничилик ришталарига асосланган стратегик шериклик муносабатлари изчил мустаҳкамланиб бораётганини мамнуният билан таъкидлаган.
«Турли даражалардаги конструктив мулоқот ва фаол алмашинувларни давом эттириш, товар айирбошлаш ҳажмини ошириш, машинасозлик, энергетика ва электротехника тармоқлари, қишлоқ хўжалиги, фармацевтика ва бошқа соҳаларда муҳим кооперация лойиҳаларини биргаликда илгари суриш муҳимлиги қайд этилди. Бизнес ва ҳудудлар даражасида амалий ҳамкорликни кенгайтириш, маданий-гуманитар дастурларни амалга оширишга алоҳида эътибор қаратилди», — дейилади хабарда.
Шунингдек, халқаро ва минтақа кун тартиби юзасидан ҳам фикр алмашилган. Телефон орқали мулоқот ҳар доимгидек илиқ, самимий ва дўстона руҳда ўтган.
Эслатиб ўтамиз, Садир Жапаров 2021 йилнинг январида Қирғизистон президенти сайловида салкам 80 фоиз овоз олиб ғалаба қозонганди. Март ойида эса Қирғизистон президенти Садир Жапаров давлат ташрифи билан Тошкентга келган.
Изоҳ (0)