Rebrending chuqur marketing tahlili va bankning uzoq yillik strategiyasi asosida amalga oshirilib, kerakli brend joylashuviga erishish va mijozlar ishonchini qozonish uchun xizmat qiladi.
Respublikamizning yirik tijorat banklaridan biri bo‘lgan “Agrobank” ATB 2021-yil 4-dekabr kuni o‘z rebrendingini e’lon qildi. Rebrending taqdimoti poytaxtimizning “O‘zekspomarkaz” ko‘rgazmalar majmuasida o‘tkazildi.
So‘nggi 5 yillikda mamlakatimiz moliya-bank tizimida ulkan o‘zgarishlar “Agrobank” faoliyatida ham yangi davrni boshlab berdi. Bu davrda kapitallashuv bazasi keskin oshirildi, mahalliy va xorijiy resurslarni jalb qilish, iqtisodiyot tarmoqlarini faol kreditlash borasidagi imkoniyatlar kengaydi.
Respublika bank tizimini isloh qilish strategiyasiga asosan, “Agrobank” ATB faoliyatini kichik va o‘rta biznesni, qishloq xo‘jaligidagi ishlab chiqaruvchilarni davlat tomonidan kredit orqali qo‘llab-quvvatlash, hududlarda jismoniy shaxslarga xizmat ko‘rsatish va kichik tadbirkorlik subyektlarini moliyaviy qo‘llab-quvvatlashga yo‘naltirish belgilangan.
Ushbu yo‘nalishda transformatsiya jarayonlarini tizimli amalga oshirish maqsadida, Osiyo taraqqiyot banki hamda KPMG kompaniyalari bilan hamkorlik aloqalari yo‘lga qo‘yilib, bankni rivojlantirishning uzoq muddatli strategiyasi ishlab chiqildi.
Yangi strategiyadan kelib chiqib yetakchi marketologlar bilan hamkorlikda yangi brend ishlab chiqildi. Unga ko‘ra, “Agrobank” oddiy insonlar uchun oddiy bank sifatida o‘z marketing kommunikatsiyasini amalga oshiradi.
Rebrending doirasidagi mahsulotlar Rossiya Federatsiyasining Artemiy Lebedev studiyasi va mahalliy dizaynerlarning o‘zaro hamkorligi asosida ishlab chiqilgan.
Jumladan, yangi logotip, naqsh (pattern) elementlari, filiallarda mijozlarga xizmat ko‘rsatish zalining yangi ko‘rinishi, bank sayti, mobil ilova, qo‘shimcha elementlar, o‘ziga xos shrift yaratildi.
Taqdim qilinayotgan yangi belgi va ko‘rinishlar “Agrobank”ning korporativ yashil rangida ishlangan va o‘zining soddaligi bilan ajralib turadi. Tashqi transformatsiya xarajatlarini minimallashtirish uchun filiallarni yangilash uch bosqichda amalga oshiriladi va rejali kosmetik ta’mirlanadi.
Shuningdek, taqdimot doirasida bankning ikki yo‘nalishida, ya’ni davlat dasturlari ijrosi va biznes yo‘nalishida yaratilayotgan ekotizim elementlari namoyish qilindi.
Ularning har biri raqamlashtirish, marketpleys yaratish va mijozlarga onlayn xizmat ko‘rsatish vositalarini ko‘paytirishga qaratilgan. Bank xizmatlari negizida esa mijozlar va ularning ehtiyojlari turadi.
Xususan, bank ekotizimi tarkibida quyidagi yo‘nalishlar mavjud:
- Chakana.uz onlayn savdo maydoni — bu yerda smartfonlar, kompyuterlar, ofis va maishiy texnikaning keng assortimenti taklif etiladi va “Agrobank” mijozlari bir necha daqiqada mahsulotlarni kreditga olishlari mumkin;
- Fermerlar maktabi — chorvachilik va parrandachilik, sabzavotchilik, bog‘dorchilik, moliya va huquqiy savodxonlik yo‘nalishlari bo‘yicha nazariy va amaliy bilimlarni beruvchi o‘quv loyihasi;
- Agrobooks — qishloq xo‘jaligi yo‘nalishida o‘quv qo‘llanmalar jamlanmasi;
- Smart ofis — mijozlarga avtomatlashtirilgan o‘z-o‘ziga xizmat ko‘rsatish markazi;
- AgroZamin — qishloq xo‘jaligi mahsulotlari va xizmatlarini sotib olish va sotish platformasi;
- Agro Finance Leasing — yuridik shaxslar uchun lizing xizmatlarini ko‘rsatish;
- Leader Finance — brokerlik kompaniyasi bo‘lib, u qimmatli qog‘ozlar bozorida barcha turdagi xizmatlarni taqdim etadi;
- AgroLab — o‘simliklarni himoya qilish biolaboratoriyasi.
Ma’lumot uchun
“Agrobank” respublikaning yirik tijorat banklaridan biri bo‘lib, 170 ta filial, 146 ta bank xizmatlari markazlari, 498 ta 24/7 ko‘rinishidagi avtomatlashgan shoxobchalar tarmog‘iga ega.
Reklama huquqi asosida.
Izoh (0)