Noyabr oxirida Turkiyaning Porlanmaz kompaniyasi taklifiga binoan “MuzA” savdo belgisi ostida mashhur bo‘lgan Sabfatek kompaniyasining bir guruh qandolatchi ustalari Konya shahriga tashrif buyurishdi. Ushbu sayohatdan ko‘zlangan maqsad, turkiyalik iste’molchilarni o‘zbekistonlik pishiriq ustalarining mahsulotlari bilan yaqindan tanishtirish, turk novvoylari bilan tajriba almashish, Turkiyada biznesni kengaytirish imkoniyatlarini ko‘rib chiqishdan iborat edi. O‘zbekistonda mashhurlikka erishib ulgurgan 12 turdagi mahsulotlar turkiyalik iste’molchilar e’tiboriga havola etildi. Kupeli novvoyxonasida o‘zbek mahsulotlarining taqdimoti va degustatsiyasi bo‘lib o‘tdi. Taqdim etilgan barcha mahsulotlar Konya aholisi tomonidan yuqori baholandi, ayniqsa, qatlamali quloqchalar, qatlamali tayoqchalar, sulidan tayyorlangan pechenyelar va mayizli rollar barchaning mehrini qozona oldi. “MuzA” xamiridan tayyorlangan uy somsasi esa barcha ishtirokchilarni lol qoldirdi.
Sayohat Turkiya ommaviy axborot vositalari tomonidan keng yoritildi. Turkiyaning eng yirik axborot agentligi Anadolu Ajansi o‘z sahifalarida “Birgalikda amalga oshirilgan sa’y-harakatlar natijasida, Turkiya va O‘zbekiston o‘rtasida mazali ko‘prik barpo etildi” deb nomlangan maqolani e’lon qildi.
Turkiyaning Konhaber.com, Merhabahaber.com, Mynet haber, BBN Magazin kabi ko‘plab nashrlari o‘zbekistonlik mehmonlarga bag‘ishlangan maqolalarni o‘z sahifalariga joylashtirdi.
Konya shahar hokimiyatida o‘zbekistonlik mehmonlarga bag‘ishlangan qabul tashkil etildi. Shuningdek, mehmonlar sayohat davomida Jaloliddin Rumiy maqbarasi va Chatal Xyuyuk qadimiy manzilgohini ziyorat qilishdi.
Shu o‘rinda Chatal Xyuyuk manzilgohini alohida tilga olish lozim. Ushbu manzilgoh insoniyat tarixidagi eng qadimiy va eng yirik shaharlardan biri. Taxminan 9000-yil oldin bu yerda 8 mingdan ortiq inson istiqomat qilgan. Manzilgoh aholisi to‘rtburchak shaklidagi uylarda yashagan, devorlari esa hayotdan olingan suratlar bilan bezatilgan. Darvoqe, mashhur amerikalik aktyor Morgan Friman ishtirokida Chatal Xyuyuk haqida qiziqarli hujjatli film suratga olingan.
Konyaga sayohatdan so‘ng, albatta, Chatal Xyuyuk manzilgohiga tashrif buyurishingiz lozim.
Turkiyalik hamkorlar va iste’molchilar bilan o‘rnatilgan mustahkam va samimiy do‘stlik aloqalarini “MuzA” vakillarining asosiy yutuqlaridan biri sifatida ko‘rsatib o‘tishimiz mumkin. Konya va Chatal Xyuyuk — sizlarga rahmat, biz yana qaytamiz!
Ma’lumot sheriklik huquqi asosida tayyorlandi.
Izoh (0)