Ukraina tashqi ishlar vaziri Dmitriy Kuleba Kiyev Donbassdagi mojaroni hal etish bo‘yicha tinchlik muzokaralarining har qanday shakliga tayyor ekanini ma’lum qildi, deb xabar beradi “Interfaks”.
“Ukraina mojaroni hal etishning diplomatik yo‘liga sodiq qoladi. Biz oldinga harakatning har qanday formatiga tayyormiz va Rossiya aynan diplomatik hal etishga sodiqligini tasdiqlashini xohlaymiz”, — deydi Kuleba.
1-dekabr kuni “Interfaks” Donbass bo‘yicha uch tomonlama aloqa guruhi Minsk maydonida yuzma-yuz muzokaralarga qaytishni rejalashtirmayotgani haqida yozgan. “Hozirda muzokaralar pandemiya sabab videokonferensiya rejimida onlayn o‘tkazilmoqda. Yaqin yillarda, balki ikki yoki undan ko‘proq vaqt ichida Minskda yuzma-yuz muzokaralar o‘tkazish qaytish haqida gap bo‘lgani yo‘q”, — deya ma’lum qilgan nashr manbasi.
Uning so‘zlariga ko‘ra, “Minsk formati” de-fakto “onlayn format”ga aylangan. “Pandemiya yondashuvni o‘zgartirib yubordi. Muzokaralar onlaynga o‘tdi. Yuzma-yuz formatga qaytish haqida gap bo‘lmadi”, — degan u.
Bahorda Ukraina tomonidan Belarusdagi vaziyat sabab Donbass bo‘yicha muzokaralarni Minksdan ko‘rish bo‘yicha takliflar berila boshlandi. Aprel oyida Leonid Kravchuk boshchiligidagi Ukraina delegatsiyasi Donbass bo‘yicha muzokaralarni koronavirus pandemiyasi yakunlangunga qadar Minskdan Polshaga ko‘chirish taklifini berdi. U mazkur muzokaralarni Belarusda “umuman o‘tkazib bo‘lmasligi”ni, chunki “u Lukashenkoning og‘zi bila Ukrainaga nisbatan juda nomaqbul gaplarni aytayotganini” ta’kidlagan. “U Rossiyaning oyog‘i ostida. U demokratim mamlakat hisoblanmaydi, u yerda tinchgina norozilik bildirayotganlar bo‘g‘iladi, shu sababli bu kabi davlatda muzokaralar uchun maydonga ega bo‘lish… hatto bu haqda gapirish ham noqulay”, — deya qo‘shimcha qilgan Kravchuk.
Minsk va Kiyev o‘rtasidagi munosabatlar Belarusda 2020-yili o‘tkazilgan prezidentlik saylovlaridan so‘ng yomonlashdi. Yevropa Ittifoqi va AQSh Lukashenkoning qayta saylanishini qonuniy deb olmadi, Ukraina esa uni lavozimini ko‘rsatmasdan shunchaki ismini aytishini ma’lum qildi.
Eslatib o‘tamiz, 20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qildi. Putin bunga javoban, agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytdi. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini aytdi va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qildi.
Izoh (0)