Afg‘onistonning sobiq prezidenti Hamid Karzay “BBC Jahon xizmati”ga bergan intervyusida AQSh prezidenti Jo Baydenga shunday murojaat yo‘lladi. Uning so‘zlariga ko‘ra, xalqaro hamjamiyat afg‘onlarga o‘z mamlakatini tiklashda va urushda yetkazilgan jarohatlarni davolashda yordam berishi zarur.
Karzay AQShning Afg‘oniston bo‘ylab aviazarbalar yo‘llashiga qarshi ekanini bildirdi:
“Agar ular (AQSh ) Afg‘oniston ustidan o‘z samolyotlarini uchirsa yoki bizning hududimizga qo‘shin kiritsa, bu noto‘g‘ri bo‘ladi. Biz AQSh bilan do‘stlikni istaymiz. Ittifoqchilarmiz, lekin do‘stlik bilan bizning osmonimiz uzra qiruvchi samolyotlarning uchishida farq bor”.
“Men mamlakatdan chiqib ketgan barcha afg‘onlardan ortga qaytib, yurtimizni tiklashni so‘rayman. Bu sizning vataningiz, biz birlashishimiz kerak. Biz shu zaminning farzandlarimiz, mamlakatni tark etmasligimiz, Afg‘onistonda qolib uni barpo etishimiz zarur”, — dedi mamlakatning sobiq prezidenti.
Karzay “Tolibon” harakati bilan mamlakatdagi mavjud vaziyat yuzasidan samarali fikr almashganini ta’kidladi:
“Tolibon” bilan uchrashuvlar o‘tkazdik. Turli masalalar, jumladan, ayollarning ishga, maktabga qaytishi, mamlakat bayrog‘i, siyosiy jarayon va barcha afg‘onlar manfaatlarini aks ettiruvchi hukumat zarurligi haqida yaxshi fikr almashdik”.
“Tolibon” tomonidan faoliyati tugatilgan qizlar maktablarining qayta ochilishi haqida gap ketar ekan Karzay toliblar “buni tushunadi va muammo hal qilinadi” deb hisoblaydi:
“Qizlarning nafaqat maktabga qaytishini, balki oliy o‘quv yurtlari, ish joylariga qaytishini istaymiz. Bu haqda “Tolibon” bilan gaplashdik. Ular rozi bo‘lishdi, tushunishdi va bu ish bo‘ladi deb aytishdi. Biz esa bu hoziroq amalga oshishi kerak deyapmiz”.
Sobiq oliy bosh qo‘mondon sifatida Karzay afg‘onlar nega jang qilmagani va o‘z vatani himoyasiga otlanmagani haqidagi savolga shunday javob berdi:
“Afg‘onlar jasur xalq. Askarlarimiz ham, ‘Tolibon’ ham. Ikki tomon ham afg‘on. Qachonlardan beri aytaman: biz og‘a-inimiz, mamlakatimizni barpo etish uchun birga mehnat qilishimiz, birlashishishimiz zarur”.
Hamid Karzay va Milliy yarashuv kengashining sobiq raisi Abdulla Abdulla “Tolibon” Afg‘onistonda nazorat o‘rnatganidan keyin ham mamlakatda qolgan Afg‘onistonning ikki eng muhim yetakchilaridir. Ular Kobulda hamon siyosiy faollik ko‘rsatmoqda.
Sentabr o‘rtasida Hamid Karzay “Tolibon” harakatining siyosatini tanqid qilib chiqgandi. O‘shanda Karzay toliblarni mamlakatda hokimiyatni egallab olganidan keyin bergan va’dalarini bajarmayotganlikda ayblagan.
Izoh (0)