Украина ташқи ишлар вазири Дмитрий Кулеба Киев Донбассдаги можарони ҳал этиш бўйича тинчлик музокараларининг ҳар қандай шаклига тайёр эканини маълум қилди, деб хабар беради «Интерфакс».
«Украина можарони ҳал этишнинг дипломатик йўлига содиқ қолади. Биз олдинга ҳаракатнинг ҳар қандай форматига тайёрмиз ва Россия айнан дипломатик ҳал этишга содиқлигини тасдиқлашини хоҳлаймиз», — дейди Кулеба.
1 декабрь куни «Интерфакс» Донбасс бўйича уч томонлама алоқа гуруҳи Минск майдонида юзма-юз музокараларга қайтишни режалаштирмаётгани ҳақида ёзган. «Ҳозирда музокаралар пандемия сабаб видеоконференция режимида онлайн ўтказилмоқда. Яқин йилларда, балки икки ёки ундан кўпроқ вақт ичида Минскда юзма-юз музокаралар ўтказиш қайтиш ҳақида гап бўлгани йўқ», — дея маълум қилган нашр манбаси.
Унинг сўзларига кўра, «Минск формати» де-факто «онлайн формат»га айланган. «Пандемия ёндашувни ўзгартириб юборди. Музокаралар онлайнга ўтди. Юзма-юз форматга қайтиш ҳақида гап бўлмади», — деган у.
Баҳорда Украина томонидан Беларусдаги вазият сабаб Донбасс бўйича музокараларни Минксдан кўриш бўйича таклифлар берила бошланди. Апрель ойида Леонид Кравчук бошчилигидаги Украина делегацияси Донбасс бўйича музокараларни коронавирус пандемияси якунлангунга қадар Минскдан Польшага кўчириш таклифини берди. У мазкур музокараларни Беларусда «умуман ўтказиб бўлмаслиги»ни, чунки «у Лукашенконинг оғзи била Украинага нисбатан жуда номақбул гапларни айтаётганини» таъкидлаган. «У Россиянинг оёғи остида. У демократим мамлакат ҳисобланмайди, у ерда тинчгина норозилик билдираётганлар бўғилади, шу сабабли бу каби давлатда музокаралар учун майдонга эга бўлиш… ҳатто бу ҳақда гапириш ҳам ноқулай», — дея қўшимча қилган Кравчук.
Минск ва Киев ўртасидаги муносабатлар Беларусда 2020 йили ўтказилган президентлик сайловларидан сўнг ёмонлашди. Европа Иттифоқи ва АҚШ Лукашенконинг қайта сайланишини қонуний деб олмади, Украина эса уни лавозимини кўрсатмасдан шунчаки исмини айтишини маълум қилди.
Эслатиб ўтамиз, 20 апрель куни Зеленский Путинга Украинанинг Донбассидаги уруш кетаётган исталган жойида учрашишни таклиф қилди. Путин бунга жавобан, агар Украина президенти Донбасс муаммосини муҳокама қилмоқчи бўлса, аввал у Донецк ва Луганск Халқ Республикаларининг раҳбарлари билан учрашиши кераклигини ва шундан кейингина учинчи томон сифатида Россия раҳбарияти билан учрашиши мумкинлигини айтди. Шунингдек, у Россия томонининг Украина билан икки мамлакат ўртасидаги муносабатлар ҳақида гаплашишга тайёрлигини айтди ва Зеленскийни «ўзига қулай бўлган исталган вақтда» Москвага келишга таклиф қилди.
Изоҳ (0)