Namanganda 3-dekabr—Xalqaro nogironlar kuni ko‘zi ojizlar uchun mo‘ljallangan turar joy va kar-soqovlar jamiyati viloyat bo‘limining yangi idorasi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Namangan shahrining “Sharshara” mahallasida joylashgan va asosan ko‘zi ojizlar istiqomat qiladigan 36 ta xonadondan iborat ikki qavatli turar joy binosi to‘liq ta’mirdan chiqarildi.
Ushbu uylarning kommunikatsiya tarmoqlari, isitish tizimlari yangilandi, zamonaviy eshik-romlar o‘rnatildi. Bino tomi, yo‘laklari va fasad qismi mukammal ta’mirlandi. Bolalar maydonchasi va tandirxonalar qurildi.
Namangan viloyati markazida kar-soqovlar jamiyati viloyat bo‘limining eskirgan binosi o‘rnida ham yangi, zamonaviy idora qad rostladi.
Bu yerda eshitish va gapirishida nuqsoni bo‘lgan insonlar uchun barcha shart-sharoitlar yaratildi. Mebellar to‘liq yangilanib, mo‘jaz kutubxona ham barpo etildi.
Viloyatda Xalqaro nogironlar kuniga bag‘ishlangan tadbirlar “Diyor” tantanalar majmuasidagi bayram dasturxoni bilan davom etdi.
Izoh (0)