Наманганда 3 декабрь—Халқаро ногиронлар куни кўзи ожизлар учун мўлжалланган турар жой ва кар-соқовлар жамияти вилоят бўлимининг янги идораси фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Наманган шаҳрининг «Шаршара» маҳалласида жойлашган ва асосан кўзи ожизлар истиқомат қиладиган 36 та хонадондан иборат икки қаватли турар жой биноси тўлиқ таъмирдан чиқарилди.
Ушбу уйларнинг коммуникация тармоқлари, иситиш тизимлари янгиланди, замонавий эшик-ромлар ўрнатилди. Бино томи, йўлаклари ва фасад қисми мукаммал таъмирланди. Болалар майдончаси ва тандирхоналар қурилди.
Наманган вилояти марказида кар-соқовлар жамияти вилоят бўлимининг эскирган биноси ўрнида ҳам янги, замонавий идора қад ростлади.
Бу ерда эшитиш ва гапиришида нуқсони бўлган инсонлар учун барча шарт-шароитлар яратилди. Мебеллар тўлиқ янгиланиб, мўъжаз кутубхона ҳам барпо этилди.
Вилоятда Халқаро ногиронлар кунига бағишланган тадбирлар «Диёр» тантаналар мажмуасидаги байрам дастурхони билан давом этди.
Изоҳ (0)