Qamchiqda ag‘anagan Isuzu, boshqa bir mashina ustiga “chiqib olgan” Lacetti. YTH tafsilotlari

O‘zbekistonda 2-dekabr kuni sodir bo‘lgan yo‘l-transport hodisalari tafsilotlarini taqdim etamiz.

Qamchiqda Isuzu ag‘anadi.

2-dekabr kuni soat 15:35 da Toshkent–O‘sh xalqaro avtomobil yo‘lining 273-kilometrida sodir bo‘lgan. Avtomobil yo‘lining ushbu qismi Qamchiq dovoniga to‘g‘ri keladi. 10 tonna guruch ortilgan Isuzu avtomashinasi yog‘och qirindisi olib ketayotgan shu rusumdagi boshqa yuk mashinasi bilan to‘qnashib ketgan.

To‘qnashuv oqibatida yog‘och qirindisi ortilgan avtomobil yon tomonga ag‘darilgan. Ikkala transport vositasining haydovchilari turli darajada yengil tan jarohatlari olgan bo‘lib, ularga o‘z vaqtida tibbiy yordam ko‘rsatildi.

Voqea joyiga FVVning “Qamchiq” maxsus qidiruv, yong‘in-qutqaruv boshqarmasi xodimlari tezkorlik bilan yetib kelib, YTH oqibatlarini o‘z vaqtida bartaraf etilgan.

Toshkentda Lacetti boshqa bir Lacetti ustiga chiqib ketdi.

Dastlabki ma’lumotlarga ko‘ra, 2021-yil 2-dekabr kuni soat 18:30 larda, Toshkent shahar, Yashnobod tumani, Elbek ko‘chasida haydovchi R.Y. (1963-yilda tug‘ilgan) boshqaruvidagi Lacetti hamda haydovchi B.I. (1988-yilda tug‘ilgan) boshqaruvidagi yana bir Lacetti avtomobillar ishtirokida to‘qnashuv sodir bo‘lgan.

Oqibatda haydovchi B.I.ga birinchi tez tibbiy yordam ko‘rsatilgan.

Mazkur YTH yuzasidan Toshkent shahar IIBB YHXB xodimlari tomonidan surishtiruv olib borilmoqda.