Namanganda piyoda vafot etdi, Toshkentda Matiz yonib ketdi. YTH tafsilotlari

O‘zbekiston yo‘llarida so‘nggi kunlarda sodir bo‘lgan hodisalar haqida batafsil ma’lumot beramiz.

Namanganda Nexia piyodani o‘limiga sababchi bo‘ldi

2021-yil 25-noyabr kuni soat 20:00 larda, “Bog‘iston” MFY hududida, Chortoq tumanida yashovchi fuqaro (1990-yilda tug‘ilgan) Nexia avtomashinasini ishonch qog‘ozi bilan boshqarib borayotib, harakat xavfsizligini ta’minlay olmay, yo‘lni kesib o‘tayotgan piyoda, Chortoq tumanida yashagan fuqaroni (1978-yilda tug‘ilgan) urib yuborgan.

Oqibatda piyoda olgan tan jarohati oqibatida voqea joyida vafot etgan.

Ushbu holat bo‘yicha Chortoq tuman IIB huzuridagi TB tomonidan 2021-yil 25-noyabr kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.

Olmazor tumani Beruniy ko‘chasida Matiz avtomobilda yong‘in sodir bo‘ldi

1-dekabr kuni soat 09:10 da Olmazor tumani Favqulodda vaziyatlar bo‘limiga Beruniy ko‘chasida Matiz avtomobilida yong‘in sodir bo‘layotgani to‘g‘risida xabar kelib tushgan.

Voqea joyiga yong‘in-qutqaruv ekipajlari soat 09:13da yetib borib, 09:14 da yong‘in batamom o‘chirilgan.

Yong‘in oqibatida fuqarolarning tan jarohati olish va halok bo‘lish holatlari qayd etilmadi. Hozirda mutaxassislar tomonidan yong‘in sababi va moddiy zarari aniqlanmoqda.

Mirzo Ulug‘bek tumanida Lacetti ag‘darildi

Dastlabki ma’lumotlarga ko‘ra, 2021-yilning 1-dekabr kuni soat 20:50 larda Toshkent shahar, Mirzo Ulug‘bek tumani, Mustaqillik shohko‘chasida, “Hamid Olimjon” metro bekati yaqinida haydovchi B.H.(2000-yilda tug‘ilgan) boshqaruvidagi Lacetti va haydovchi X.Q.(1998-yilda tug‘ilgan) boshqaruvida bo‘lgan Spark avtomobillar ishtirokida to‘qnashuv sodir bo‘lgan va Lacetti avtomobil ag‘darilgan.

To‘qnashuv oqibatida tan jarohati olgan fuqarolar yo‘q.

YTH yuzasidan Toshkent shahar IIBB YHXB xodimlari tomonidan surishtiruv olib borilmoqda.

Chilonzor tumanida 2 ta Spark to‘qnashdi

Telegram’dagi kanallarda 2 ta Spark ishtirokida yo‘l-transport hodisasi sodir bo‘lgani aks etgan video tarqaldi. Holat Toshkent shahri Chilonzor tumanida bo‘lgani aytilmoqda.

Voqea oqibatida jabrlanganlar bor yoki yo‘qligi noma’lum. Holat yuzasidan hali rasmiy xabar berilmagan.

Novzada Spark Damas’ga borib urildi

Telegram kanallarda Chilonzor tumanidagi yo‘l-o‘tkazgichda Spark va Damas ishtirokida to‘qnashuv sodir bo‘lgani xabar qilindi. Jabrlanganlar haqida ma’lumot yo‘q.