2021 йилнинг 1 декабрь куни «Навбаҳор» клуби собиқ бош мураббийи Андрей Канчельскис номаълум кимсалар томонидан таҳдид бўлганини айтиб, полицияга мурожаат қилгани ҳақида маълумотлар тарқалди. Мутахассисга кўра, мазкур шахслар Канчельскиснинг «Навбаҳор» жамоасига қўяётган молиявий талабларни камайтиришни қатъий сўраган.
Ушбу хабар юзасидан «Навбаҳор» футбол клуби расмий баёнот берди. Унда «Навбаҳор» «1,6 миллион доллар компенсация» қарори юзасидан берилган апелляцияда ютиб чиқишга яқин экани, шу боис россиялик мутахассис CAS’да ўзини оқлаш учун турли уйдирма ва бўҳтонлар ўйлаб топаётган бўлиши мумкинлиги айтиб ўтилган.
1 декабрь куни Россия ва Ўзбекистоннинг спортга ихтисослашган аксарият интернет нашрлари ҳамда ижтимоий тармоқларида «россиялик мураббий Андрей Канчельскисга номаълум шахслар томонидан таҳдид қилингани ва мутахассис ушбу масала юзасидан полицияга мурожаат этгани» билан боғлиқ маълумотларнинг тарқалиши футбол жамоатчилиги томонидан турлича қабул қилинди, ҳаттоки, айримларда ноўрин шубҳа ва янглиш тасаввур пайдо бўлишига сабаб бўлди, айниқса, «Навбаҳор» жамоаси мухлисларининг кўпчилигида хавотир уйғотди.Канчельскис маошларини вақтида ололмагани сабаб «Навбаҳор» билан шартномани бекор қилганди. Шундан сўнг у қолиб кетган маошларини ундириш учун ФИФАга ариза ёзгани ҳақида хабар берилганди. ФИФА Канчельскис ва «Навбаҳор» ўртасидаги ишни россиялик мураббий фойдасига ҳал қилиб, клубга 1,6 миллион доллар тўлаб беришни юклаганди.Шу муносабат билан «Навбаҳор» профессионал футбол клуби мазкур ҳолат бўйича шуни маълум қиладики, жорий йил август ойида ФИФА томонидан «...Андрей Канчельскисга 1,6 миллион доллар миқдорида компенсация пули тўлаб бериш...» юзасидан чиқарилган қарор бўйича «Навбаҳор» Халқаро спорт арбитраж судига (CAS) апелляция йўллаган. Ушбу жараёнда «Навбаҳор» томонидан CAS’га тақдим этилган далил-исботлар суд ишида ютиб чиқиш имконини беради.
Андрей Канчельскис шахси билан боғлиқ бу каби маълумотларнинг интернет нашрлари ва ижтимоий тармоқларда тарқатилиши россиялик мутахассиснинг келгусида CAS’да ўзини оқлаш учун қилинаётган, ўз навбатида, «Навбаҳор»га қарши фойдаланиш учун ўйлаб топилган уйдирма ва бўҳтонлар бўлиши мумкинлигини ҳам инобатга олиш даркор.
«Навбаҳор» ва клуб манфаатларини ҳимоя қилаётган юристлар ушбу ҳодисадан анча олдин хабардор эди. Чунки Андрей Канчельскиснинг юристлари ҳодиса бўйича «Навбаҳор» юристлари билан боғланганда, «Навбаҳор» бу ҳодисадан хабари йўқлигини, лекин ҳолат юзасидан ҳар қандай ёрдам беришга тайёрлигини маълум қилганди.
«Навбаҳор»га алоқадор ҳар қандай воқеа-ҳодисага юридик жиҳатдан тўғри ёндашишга, мавжуд масалаларни қонуний томонлама ҳал этишга ҳаракат қилиб келади, бундан кейин ҳам шундай бўлиб қолади.
«Навбаҳор» ПФК матбуот хизмати.
«Навбаҳор» собиқ мураббийи «Матч ТВ»га берган интервьюсида Наманган шаҳри жамоаси билан боғлиқ муаммолар ҳақида сўзлаб берганди.
Изоҳ (0)