Дунёнинг энг қиммат шаҳарлари рейтингида Тель-Авив биринчи ўринни эгаллади. Рейтинг Британиянинг The Economist журнали аналитика бўлими – Economist Intelligence Unit (EIU) томонидан тузилган.
«Тель-Авив илк бор рейтингда биринчи ўринни эгаллади, ўтган йили у бешинчи ўринда эди. Тель-Авивнинг бундай кўтарилиши, аввало, Исроил пул бирлиги шекелнинг АҚШ долларига нисбатан кучини акс эттиради», — дейилади EIU матбуот баёнотида.
Рейтингдаги иккинчи ўриндан Париж, ундан кейин Сингапур жой олган. Тўртинчи ва бешинчи ўринларини мос равишда Сюрих ва Гонконг эгаллаган. Дунёнинг энг қиммат шаҳарлари 10 талигига Нью-Йорк, Женева, Копенгаген, Лос-Анжелес ва Осака ҳам киради.
Ҳисоботнинг очиқ қисмида ўтган йил давомида рейтингда энг кўп поғонага кўтарилган шаҳарлар ҳам санаб ўтилган. Хусусан, ушбу маълумотларга кўра, Теҳрон 79-ўриндан 29-ўринга кўтарилган. Теҳронда яшаш нархининг ошиши «таъминот билан боғлиқ қийинчиликлар, товарлар танқислиги ва АҚШ санкциялари қайтганидан кейин импорт нархларининг ошиши» билан изоҳланади. Киев бир йил ичида 101-ўриндан 88-ўринга, Москва эса 106-ўриндан 96-ўринга кўтарилди.
Рейтингга кўра, Дамашқ, Триполи, Тошкент, Тунис ва Олмаота яшаш учун дунёдаги энг арзон шаҳарлар деб топилди. EIU йилига икки марта дунёнинг 173 та шаҳри учун яшаш қиймати индексларини ҳисоблаб чиқади. Мутахассислар озиқ-овқат, кийим-кечак ва уй-жой ижараси каби юзлаб товар ва хизматларнинг нархларини кўриб чиқади.
Июнь ойида Mercer халқаро консалтинг компанияси чет эллик ишчилар яшаши учун энг қиммат бўлган дунё шаҳарлари рейтингини тузган эди. Ашхобод хорижликлар яшаши учун энг қиммат шаҳар деб топилган, Тошкент эса энг арзон шаҳарлардан бири бўлган.
The Economist томонидан 2020 йилнинг март ойида эълон қилинган рўйхатда Тошкент 132-ўринни эгаллаб, энг арзон шаҳарлар қаторидан жой олганди, ноябрь ойидаги рейтингда ҳам Тошкент 132-ўринни сақлаб қолган.
Изоҳ (0)