1 ноябрь куни Қирғизистон пойтахти Бишкекда мухолифатдаги «Ота макон» партияси етакчиси Омурбек Текебаевга ҳужум уюштирилди. Бу ҳақда партия бош штабига таяниб, «ТАСС» хабар берди.
«Бир нечта ниқобли киши шаҳар марказида Текебаевга ҳужум қилиб, кўзойнагини синдирган ва телефонини тортиб олган», — деди партия вакили. Унинг сўзларига кўра, сиёсатчи жиддий жароҳат олмаган.
Текебаевнинг ўзи ҳужумни сиёсий фаолияти билан боғлаган. «Мамлакатда бир-бирига зид қарашларга барҳам беришга уринилмоқда», — деди у журналистларга. Текебаев, шунингдек, ҳужумчиларни унинг буюмларини қайтаришга чақирди.
28 ноябрь куни Қирғизистонда Олий Кенгашга (парламент) сайловлар бўлиб ўтди. Дастлабки маълумотларга кўра, парламентга олтита партия ўтади: «Ота юрт Қирғизистон» (айни вақтда мамлакатдаги ҳукмрон партия), «Ишонч», «Уйғунлик», «Альянс» мухолифат партияси, «Ягона Қирғизистон» ва «Имон нури» партиялари.
«Ота Макон» парламентга кириш учун зарур миқдордаги овозларни тўплагани йўқ. Сайловчиларнинг тахминан 35 фоизи овоз беришда қатнашган, овозларни қўлда санаш давом этмоқда.
28 ноябрь куни кечқурун овозларни электрон ҳисоблаш вақтида сайлов комиссиясининг сайтида носозлик кузатилди, у бир неча дақиқа ишламай қолди. Қайта ишга тушгандан сўнг, сайтда аввалги версиядан фарқ қиладиган маълумотлар пайдо бўлди. МСК веб-сайтидаги носозлик туфайли ўнта партия гўё жами 150 фоиздан ортиқ овоз тўплаб, парламентга киргани ҳақида маълумот пайдо бўлган. МСК бу операторнинг техник хатоси эканига ва тезда тузатилганига ишонтирди. Ушбу ҳолат бир қатор мағлуб бўлган партиялар, жумладан «Ота Макон» вакилларининг овоз бериш натижаларини тан олишдан бош тортишига сабаб бўлди.
Аввалроқ парламент сайловлари вақтида «Ордо» партияси етакчиси Мирбек Мияров бедарак йўқолгани хабар қилинди. У сайловда овоз берганидан кейин ғойиб бўлган. Мияровни қидириш ишлари деярли икки сутка давом этган. 30 ноябрь куни унинг ўзи алоқага чиқиб, тоғда кўнгилсизликка учраганини маълум қилган.
Эслатиб ўтамиз, бир йил аввал октябрь ойида Қирғизистонда парламент сайловлари бўлиб ўтган, кейинчалик Қирғизистон Марказий сайлов комиссияси Бишкекда оммавий норозилик намойишлари бошланишига сабаб бўлган парламент сайловлари натижаларини ҳақиқий эмас деб топганди. 2021 йил августда Қирғизистон президенти Садир Жапаров 28 ноябрь куни Республика парламенти депутатлари сайловини ўтказиш тўғрисида фармонни имзолаган.
Изоҳ (0)