Qatar Airways O‘zbekistonga muntazam aviaqatnovlarini amalga oshirish uchun sentabr boshlarida ruxsatnoma olgandi. Kompaniya matbuot xizmatining ma’lum qilishicha, Dohadan Toshkentga birinchi reys 2022-yil 17-yanvar kuni amalga oshiriladi.
Qayd etilishicha, muntazam qatnovlar Toshkentni Dohadagi Hamad xalqaro aeroporti orqali BAA, Saudiya Arabistoni, Hindiston va AQSh kabi 140 dan ortiq yo‘nalishlarga bog‘laydi.
Reyslar haftasiga ikki marta: Dohadan Toshkentga dushanba va juma kunlari, Toshkentdan Dohaga esa seshanba va shanba kunlari amalga oshiriladi.
Parvozlar Airbus 320, Airbus 321, Airbus 350, Boeing 777 va Boeing 787 samolyotlarida amalga oshirilish rejalashtirilayotgani ma’lum qilingandi. Dastlabki reys 12 o‘rinli biznes klass va 120 o‘rinli ekonom klassdan iborat Airbus A320 samolyotida amalga oshiriladi.
Avvaloq O‘zbekiston va Afg‘oniston o‘rtasida to‘g‘ridan to‘g‘ri aviaqatnovlar yo‘lga qo‘yilishi haqida xabar berilgan edi.
Izoh (0)