Turkiyaning Istanbul shahrida yuz bergan kuchli dovul qurbonlari soni 4 nafarga yetdi, 19 kishi jarohat oldi. Bu haqda shahar gubernatori ma’muriyatiga tayanib, “Izvestiya” xabar berdi.
“Favqulodda vaziyatlar va tabiiy ofatlar boshqarmasi ma’lumotlariga ko‘ra, Istanbulda boshlangan kuchli shamol natijasida to‘rt kishi halok bo‘lgan, 19 kishi jarohatlangan, ulardan uch nafarining ahvoli og‘ir”, — deyiladi xabarda.
Avvalroq Istanbulning Esenyurt tumanida dovul tufayli bino tomi qulab, uning ostida qolgan ikki kishi halok bo‘lgani, to‘qqiz kishi jarohat olgani haqida xabar berilgandi.
Shuningdek, qattiq shamolda Istanbuldagi soat minorasi qulab tushgan, uning qulashini guvohlar suratga olgan. Ushbu hodisa natijasida hech kim jabrlanmagan.
Shaharning madaniy tumani bo‘lgan Beshiktoshda yuz yillik chinor to‘xtab turgan mashina ustiga qulagan. Bursa shahri hududida esa daraxt uning ostidan o‘tayotgan mikroavtobusni bosib qolgan, ikki yo‘lovchi jarohatlangan.
Hukumat bo‘ronli shamol tufayli Bosfor bo‘g‘ozida kemalar harakatini to‘xtatdi. Shuningdek, Turkiyaning oltita samolyoti Istanbulga qo‘na olmagani qayd etilgan. Turkiya meteorologiya bosh boshqarmasi kuchli shamol esishi kutilayotgan 17 viloyatni xavfning “to‘q sariq” darajasidan ogohlantirgan.
Izoh (0)